汕尾魚蛋

我家婆婆除咗拿手整菜茶，汕尾魚蛋亦都係佢嘅強項。每次整汕尾魚蛋都好大陣仗，喺地下鋪上膠墊，放上砧板，再準備一盆水。兩大條銀光閃閃嘅魚喺側邊已經準備就緒！細細個唔知呢啲叫咩魚，只會叫佢做閃閃魚，後來先知原來呢一種叫做馬鮫魚。

去頭去尾，片開魚皮，挑出魚骨，起肉。再用刀剁到起膠，調味，最重要係加入喺海豐帶嚟嘅大地魚粉，增添香氣。準備好魚漿，用拇指同食指擠出一粒圓球，再用湯匙一刮，放入水成型。做好之後整齊排列喺大圓碟上面，蒸好會膨脹成魚蛋餅，可以放雪櫃保存一段時間。食嘅時候搣開一粒粒，放湯又好，煮公仔麵落兩粒做配料又得，婆婆整嘅汕尾魚蛋絕對係全世界最好味嘅！

以前細個唔識得珍惜，「吓！又魚蛋？」依家想食？除咗向婆婆偷師，街邊都有凍肉舖有得買！曾經見過長沙灣順寧道青霖凍肉店有，不妨問吓老細幾時有貨。