《莎木3》銷量一個「慘」字

早排土下座曾經都講過《莎木3》嘅問題係舊酒舊瓶，當年DC推出，結果論嚟講，就已經係因為遊戲唔吸引而導致救唔到主機之餘，連自己都救唔到，偏偏鈴木裕似乎唔明白《莎木》有根本問題，依然重複返當年嘅審美觀同核心遊戲玩法，結果又再次開發一款同以前一模一樣(唔吸引)嘅遊戲出嚟，都可以話非常頑固。縱使遊戲係歷史上集資最高金額嘅遊戲，但事實《莎木3》日本銷量一樣慘淡，首周賣唔到18,000隻，第二周排名仲低過《勇者鬥惡龍11S》(9月推出)嘅4,000隻，就算計埋海外及銷量及眾籌買家，估計整體加埋銷量都未必有10萬隻，唔好話3A級，可以話連B級作品都唔算係。再睇數字，《莎木3》開發資金計計埋埋可能有1,000萬美金上下，雖然同當年「100億日圓傳說」相比少咗好多，但莫講賺錢，睇怕銷量都未填到開發條數，以今集銷量估計，《莎木》再有續作機會微乎其微，似乎呢個寫好咗十幾年而且本身都唔係太吸引嘅故事，粉絲都永遠都唔會有睇到大結局嘅一日。