錫菲聯「鐵」般硬淨

李斯特城今季再發圍，令英超傳統亂陣腳，北倫敦雙雄熱刺及阿仙奴未到季中已易帥；還有一隊不起眼嘅升班馬、來自「鋼鐵之城」嘅錫菲聯，盤踞前六多時，勝過一半Big Six球隊，若然喺緊接快車檔期3戰「不死」，今季可確認再多支黑馬搞局。錫菲聯今季表現暫時遠勝另外兩支喺降班區域掙扎嘅升班馬，只見「神話再現」嘅李城走勢轉弱，下場要招呼出爐世冠盃冠軍紅軍難打；反而錫菲聯仲穩，聯賽作客未輸過，最勁係大部分比賽喺被睇淡下搶分成功，放送驚喜。隊波擅地面推進，中前場位位打仔格，入球及助攻皆能，擁4箭頭輪流出，唔怕打得密；每場聯賽射門次數同控球百分比，英超倒數尾嗰幾隊，但入球七成以上係生波，極少靠死球靠衝靠撞，卻又交到佳績，每場爭贏頭槌次數反而排第二，實而不華，屬英超另類。呢隊叻過同市錫周三嘅「鋼鐵之霸」，快車3戰先迎屈福特，之後作客曼城同利物浦，先甜後苦，如果攞多過4分，呢份送俾擁躉嘅新年禮物唔細囉。