日安時刻 Let’s do lunch

喺世界各地，飲食文化佔咗每人生活非常重要嘅一席位。人有開心事會約食飯慶祝，有要事會約食飯商討，無聊時會約食飯當作消遣，工作時會約食晏聯聯誼、唞唞氣。每日嘅午飯時間更加係上班族每日絕無僅有忙裡偷閒嘅機會𠻹，非常珍貴。

尋晚去咗中環大館一個展覽《日安時刻 Let’s do lunch》。展覽由食快飯、行政午餐、公司福食等等，圍繞住中環人嘅餐桌眾生百態。午餐快有快食、慢有慢食。有喺午飯時間見識過office林立嘅中環就會知道情況有幾墟冚，因為無論再忙，中環人總會擠出數十分鐘出去外面食個快飯，甚至出去買外賣當係唞唞氣。

相比起香港嘅上班一族，瑞典人一般都冇咁重視午飯時間。可能因為餐廳嘅選擇並唔多，又或者係同瑞典嘅嚴寒氣候有關，唔少瑞典上班族都會帶飯返公司，又或者求其買個三文治食就算。瑞典人反而比較重視Fika(Fika係瑞典語，字面上面可以譯作coffee break。意指咖啡小休，通常會配合埋茶點。) 瑞典人視Fika如命，尤其係打工仔，甚至有法例規定僱員每日至少要有三次Fika𠻹。我老公話佢高峰期試過一日六、七次Fika𠻹，實在驚人。

雖然係各處鄉村各處例，但無論去到地球邊個角落，人始終離不開「食」。一日咁多餐裡面，唔知你最重視嘅係邊餐呢？午餐時間心水嘅快飯之選又係啲咩呢？就快又到農曆年年尾，又係同家人朋友約時間食團年飯，聚一聚頭嘅好機會。

一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。

fb：為何斯德哥爾摩沒有譚仔三哥 by 三家姐 ig ：sis3ter