最近由台灣獨立遊戲團隊Gamtropy開發嘅手遊《實況旅人Subscribe to My Adventure》喺App store上架，唔同其他A級手遊咁有大量YouTuber或明星宣傳，呢隻遊戲美術風格特別，玩法亦好另類，好容易會被玩家錯過。《實況旅人》係一隻模擬Facebook介面設計嘅第一身冒險遊戲，玩家作為「Halbook」用戶，同時亦係冒險者及直播主，每次喺Halbook開Live都係同粉絲分享你嘅冒險情況，為求得到更多訂閱同觀看人數。除咗要學攻擊技能之外，亦要學啲有娛樂性嘅技能，例如一邊打怪一邊自拍或唱歌等。但係，隨著劇情發展，你會被捲入一件王國失竊案當中，不止平時喺Halbook上嘅好友會落井下石，連你嘅Fans都會不斷留言攻擊你，每次開Live仲會引來大量Haters，最終甚至發展到帳戶俾人投訴到被官方封鎖。雖然事件好快平息，但劇情繼續發展會衍生更多古怪事件，相當有娛樂性。由於遊戲介面設計非常咁仔細，實在同真嘅Facebook分別不大，因此玩落你會好輕易投入到個世界觀，令到劇情更有感覺，特別係俾Halbook封鎖帳戶時，真係會有種失落。由於玩法太創新，就咁講大家唔會明白遊戲真正體驗，建議各位試玩！