大家喜歡食Pizza嗎？最喜歡嘅係邊款口味嘅Pizza呢？同一塊麵糰，加上唔同嘅配料，成全咗各人不同嘅喜好。各處鄉村各處例，瑞典其實都有獨一無二口味嘅Pizza㗎。你以為會係臭魚肉丸Pizza？錯喇。真正答案係最令人意想不到嘅「咖喱香蕉Pizza」。材料有咖喱同香蕉片，通當會配以火腿或者其他肉類。咖喱配香蕉或者聽落怪異，卻係好多瑞典人嘅最愛(亦係我先生嘅最愛，佢個人推薦額外加花生，將火腿換成雞肉)。
據說咖喱香蕉Pizza發明於七十年代嘅瑞典，當時瑞典剛開始引入香蕉呢款熱帶水果。Pizza店家為咗吸引顧客，大膽地將充滿異國風情嘅香蕉、咖喱，兩樣風牛馬不相及嘅食物一同加入Pizza，豈料反應極佳。呢款Pizza更加成為咗瑞典獨有嘅口味，一直流傳至今。大部分斯德哥爾摩嘅Pizza店都會有呢款Pizza供應，喺餐牌上亦唔難搵到。瑞典名稱係“Banan ch curry pizza”或“Africana Pizza”，通常被歸類為「經典系列」。
雖然世界各地已經發展出自己獨有嘅Pizza文化，畢竟呢樣食物起源於意大利，所以意大利人對於Pizza仍然有一定程度嘅執著。聽聞意大利鎖國期間，民眾紛紛搶購物資，超市內幾乎所有食物都被搶購一空，唯獨大批急凍夏威夷Pizza無人問津。單係夏威夷Pizza上面幾片菠蘿都可以令意大利人如此反感，唔知意大利人會對呢款咁有創意嘅咖喱香蕉Pizza有何感想呢？鍾意刺激嘅朋友下次嚟斯德哥爾摩旅行，不妨試下呢款國寶級食物，或者會令你一試愛上。