朋友勁讚韓劇《雖然是精神病但沒關係》描寫因背負人生重擔而拒絕愛情的精神病院男護士與擁有反社會人格的童話女作家相戀，好睇到不得了。我一看演員名單由金秀賢、徐睿知擔綱，配以唯美劇照，我說：「咁靚，梗係無關係啦。」
港產片《幻愛》掀起談論，報章找到故事原型人物──同患解離症人格的一對情侶，自稱「我們連怎樣認識都不知道」，似足劉俊謙和蔡思韵。金童玉女？新聞圖片大失所望了：肥妹雙腳擱在肥仔肚腩，一個掛住玩手機，一個睡懶覺。
諗深一層，這才貼近真實精神病患者寫照，無所事事，難以集中注意力，不修邊幅，導致儀容亦稍遜。怎可能位位像金秀賢、徐睿知、劉俊謙、蔡思韵俊朗漂亮？直接地講，扮靚化妝，乃花錢的技術活，患者通常窮或學不來。
梁朝偉曾獲邀領銜《顧城別戀》(1998)，飾演殺妻兼自殺的現代詩人顧城(1956-1993)，結果沒成事，馮德倫執二攤，同樣靚仔。某女同事感慨說：「讓我做顧城妻子，也寧願為他犧牲。」我話：「你睇過顧城真人照片再講。」
影視都慣性美化，美化得形同誤導、虛偽，似乎不如此便不懂拍攝。
我絕無歧視之意，恰恰相反，請大家接受精神病患者有不夠美麗的一面(正如人人皆有)，別一廂情願離地幻想，到頭來與現實落差太大，更嫌棄他們。