每年3至5月期間，都係一年一度《Eurovision Song Contest》(歐洲歌唱大賽)嘅盛事。參賽地區會各派出一名個人或隊伍代表表演歌舞。觀眾會透過電話、網絡等投票，各國之間亦互相俾分去選出優勝者，贏咗嘅國家就會成為下年嘅主辦國。搞一場咁大型嘅活動需耗費不少，而且近年歐洲國家有唔少恐怖攻擊事件發生，所以唔少人對勝負都抱持唔同嘅態度。
第一屆嘅Eurovision歌唱大賽於1956年舉行，歷年共有52個國家同地區參與。至今已經舉行咗64屆，瑞典亦參與咗其中59年。人所共知嘅ABBA樂隊，當年就係憑住勝出1974年Eurovision歌唱大賽而走紅。仲記得2015年去咗瑞典朋友家睇決賽直播，結果瑞典獲勝，人人都睇到血脈沸騰，投入程度令人大開眼界。
受疫情影響，今年本於荷蘭舉行嘅Eurovision史無前例地取消，好多歌迷都感到失落。下年嘅Eurovision歌唱大賽將暫定於2021年5月18至22 日。
雖然今年嘅比賽取消咗，但有套關於Eurovision嘅喜劇電影：《Eurovision Song Contest: The Story of Fire Saga》喺線上電影平台上畫。電影唔止關於Eurovision歌唱大賽，仲摻雜咗好多北歐文化嘅元素，輕鬆幽默。我同丈夫睇咗套電影幾次都仲會笑出聲，仲開始識唱電影入面嘅參賽曲。另外有趣嘅係，雖然故事設定主角來自冰島，女主角嘅幕後代唱Molly Sandén卻係瑞典人，男主角Will Ferrell喺現實生活中嘅太太都係瑞典人呢！真係北歐一家親。推介呢套電影俾對Eurovision同北歐文化感興趣嘅朋友。
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐
ig：sis3ter