祝大家新年快樂，希望今年好過上年，事事順利啦！假期就放完，今期稿同大家帶嚟新消息同舊回憶。話說千禧年前後，PC單機遊戲仍係主流，華文遊戲以台灣開發為首，講真出過唔少高質素遊戲，同期中國大陸遊戲先叫剛剛開始，九成作品唔係有心無力就係粗製濫造，又點會估到而家風水輪流轉，連台灣招牌《仙劍奇俠傳》、《軒轅劍》新作都係大陸班底，中國game亦已唔係垃圾。當年除咗「雙劍」出名，有一間喺業界默默耕耘多年，出名做game「貴精不貴多」嘅漢堂國際，終於憑一款《天地劫》成為一線大廠，兩年後再推續作《幽城幻劍錄》，更成中文PC遊戲巔峰之作，中港台無人不識。可惜，「成也天地劫、敗也天地劫」，《幽城》名氣雖大，但叫好唔叫座，皆因老翻當道，竟然出現攻略本比遊戲好賣嘅情況，漢堂為止血，急急再推續作《寰神結》，不過急推嘅結果係《寰神結》質素低劣，大量bugs及遊戲問題無法透過更新解決，亦成為漢堂最後一款遊戲……講咗咁多其實就係想講，大陸game廠早年已買下IP再造經典，而《天地劫：幽城再臨》手遊即將喺3月在大陸app store上架。字數所限日後再續，千祈唔好以為今期賣廣告，實情係土下座都係呢個系列嘅fans，當年全部買正版，真心分享㗎！