林穎彤(Bella)10歲時曾演出亞視的《萬家燈火》，扮演馮寶寶女兒，年紀少少的她演技獲不少人大讚。當年她與母親接受鮑起靜訪問，片中更提到林母因被丈夫拋棄，生活失去支柱，於是孭住女兒到葵芳站街頭行乞。此片是18年前的訪問片段，日前ATV亞視數碼媒體在YouTube上載，再次成為大家熱話。
年紀少少的Bella在《萬家燈火》的表現，令不少人大讚。
當時的田蕊妮與Bella一同宣傳。
片段見到林母憶述遭老公拋棄時，不禁眼泛淚光，「我時時喺屋企煲湯等佢，但佢一意故行要搬出去，我都冇辦法。穎彤得1歲，家姐得9歲，好傷心、好失意，又搵佢唔到，希望見到佢，或者俾啲生活費，惟有孭住個女去乞錢。」
之後Bella與母親及鮑起靜重臨昔日行乞的天橋，林母直言當時曾萌起輕生的念頭︰「我又病，又俾人迫遷，冇錢買奶粉，冇錢交租，想我哋三母女搬走，又唔敢返屋企，因為隨時有人上嚟拆門劈鐵閘，嚇到我哋成日喺天橋流離浪蕩。當時喺天橋望落下面，就諗不如跳落去啦，當時我孭住穎彤，望落天橋下面時，佢差啲好似瀡滑梯咁瀡落去，好彩捉住佢腳仔先冇事。」林母又指當時每晚9時至12時都會到該處行乞，長達9個月時間，幸好有人教她申請綜援，之後一度攬住Bella哽咽。
林母回憶往事時，仍眼泛淚光。
在旁的Bella聽罷不禁眼泛淚光，「諗唔到我細個時，佢係咁樣養我，想佢唔好咁辛苦，第時開心啲，唔好再住呢啲樓（公屋），買層靚啲嘅樓俾佢住。」林母在旁為Bella抹眼淚說：「唔好喊啦，你喊我又喊，媽咪唔係要住靚樓，最緊要係你哋兩個身體健康，好開心你哋咁聽話。」
Bella聽到眼濕濕，林母一度哽咽。
在旁的鮑起靜大受感動。