時尚品牌Balenciaga一款2,145美元(約16,731港元)新袋上市，點知一出就被發現勁似IKEA招牌Frakta購物袋，成為網上熱話。
IKEA馬上抽個靚水，幫Frakta購物袋影輯名牌袋咁嘅靚相，仲要教大家6大招認清「正貨」：
1) 搖一搖：如果發出沙沙聲，就係正貨。
2) 多功能：可用來放曲棍球裝備、磚塊，甚至水。
3) 丟入泥中：正貨只要用水一沖就乾淨。
4) 摺得埋：可摺到細成銀包尺寸？恭喜晒，係正貨。
5) 睇裡面：正貨有真．IKEA標誌。
6) 睇價錢：標價只要0.99美元。
呢項廣告設計係IKEA同瑞典廣告公司ACNE合作，網民留言大讚勁好笑。
