現時唱K仍有不少人點唱泳兒（Vincy）與海鳴威合唱《我的回憶不是我的》，過往都有不少人開PO討論失蹤人口海鳴威，最近Vincy就帶同當年拍攝歌曲的MV工作人員，一齊與海鳴威食飯見面！
Vincy話：「最近成日都唱呢隻歌、成日都有人講起呢隻歌，所以send個message問佢：『你幾時會嚟香港呀？聚吓吖。』咁啱佢嚟香港做嘢，所以我哋就約咗出嚟食飯。」二人多年沒見，一見面就當然要合唱《我的回憶不是我的》，但他們唱的竟然是惡搞版本「當晚與你記住羅家英」，搞到全枱人大笑。
Vincy更大爆當年「蝦碌嘢」，原來當時只花了兩日時間去拍攝MV及錄音，MV入面的衣服因為不合身，要立刻問同事嘅太太借衫拍攝，除此之外，當時拍攝亦出現好多阻滯，「髮型師同化妝師miss咗班火車；拍攝時落雨，因為現場有泥地，所以本身借咗對鞋唔着得，最後化妝師即時除咗佢對鞋俾我去拍。」
她更直言沒想過這首歌會爆紅，「當時收到隻歌個時，我係麻麻哋想唱，因為成件事太急，對成件事好冇信心。不過我冇諗到隻歌出咗之後會變成自己其中一首代表作，亦都好多謝海鳴威share咗半隻歌俾我。」Vincy說︰「好開心大家可以keep到呢個友誼，呢個友誼好難得。」