唐詩詠的上衣不時移位，她唯有夾實影相。
唐詩詠、黃德斌、何廣沛等昨日到馬場出席活動，唐詩詠以低胸露腰禮服上陣，但上衣太過鬆身，令她不時要整理衣衫，拍照時步步為營，以防走光。
她表示衣服是由大會度身訂造，雖已做足安全措施，但可能近日消瘦的關係，令她一步一驚心。她說︰「可能瘦咗，所以行嗰陣都要小心啲。因為最近領養咗隻BB貓，就嚟兩個月大，每朝6點起身餵食，每3個鐘就要輪流餵，十足奶媽一樣。」她指貓BB是由陸永的貓所生，坦言湊貓BB已經很忙碌，難以想像日後要生B的景況︰「依家都好掛住啲貓，如果第時生B，我諗第一年都會想照顧佢，真係冇辦法放低佢。」
同場的黃德斌稱因為拍攝關係，所以略懂策騎，又謂身邊有不少朋友是馬主，間中也會被邀到馬場觀賞賽事及用膳。問到有沒有興趣做馬主，他說︰「隨緣，睇下有冇朋友搵我一齊。」至於首次入馬場的何廣沛，直言大開眼界，但不敢下注︰「我好驚輸晒啲血汗錢！」
黃德斌表示剛忙完拍攝電影，現正休息中。