師父有請｜龔嘉欣自揭搞火鍋生意大壓力到停經

由林盛斌及麥玲玲師傅主持的《Master's Talk師父有請》，最新一集找來「少婦聯盟」三位成員陳凱琳、龔嘉欣及譚凱琪擔任嘉賓，大談生意經。

龔嘉欣近年在馬來西亞開設火鍋店，她表示自己愛親力親為，由裝修、揀碗和試湯底等都自己去做，她說：「我鍾意落手落腳，火鍋利潤好高，而且當地仍然有明星效應，我哋去到都幾受歡迎呀！」龔嘉欣表示自己做生意只是副業，因她習慣投放太多感情去做，甚至大壓力到一度停經。

因為疫情令生意大受影響，龔嘉欣說：「好頭痕，當生意忙到停唔到手嘅時候，突然遇上疫情，無辦法惟有等，我仲要係提供員工包食包住，冇辦法惟有照俾，我覺得好難得遇到一班肯為你做嘅同事，所以守住先。」她形容感覺流緊血。

譚凱琪在5至6年前開設過一家餐廳，營運了3年時間，起初生意不錯，不過由於位處於銅鑼灣又遇上社會問題，加上租約期滿，她認為沒辦法繼續維持，所以結束生意。她說：「做生意真係好難，特別係管理，樓面同事話射波就射波，真係好難搞。不過如果好幫得手嘅廚師，我哋就會畀佢入股，咁樣佢會做得投入啲。」