奧斯卡頒獎禮下星期一舉行，一路諗住呢份稿要寫「最佳電影」。
當時我未睇《月亮喜歡藍》。可能有人會話：「喂！今年先嚟拍黑人成長嘅戲，擺明博攞奧斯卡啦！」
但事實係，呢個劇本之所以來到導演巴利贊堅斯手，再拍成電影，過程相當「玄」，
由籌備到選角，拍攝以至走入奧斯卡，一切都係意料之外，老土啲講，緣份嚟嘅，施主。
文：Wing
《月亮喜歡藍》喺入圍今屆奧斯卡最佳電影嘅9部作品中，算係勝數較高嘅一部。該片至今已橫掃多個影展包括金球獎「最佳電影」獎項，成績超越其他入圍黑人電影，如《NASA無名英雌》、《Fences》等。《月》全片分成3個章節，以主角非裔美國男孩舒朗嘅童年、少年及壯年不同成長階段劃分。
說自己的故事
此片劇本來自麥克阿瑟天才獎得主─舞台劇作家泰雷艾芬麥簡尼(Tarell Alvin McCraney)，依家嘅佢，已經係皇家莎士比亞劇團駐團作家。佢曾經向邁阿密Borscht電影節提交過一篇名為《In Moonlight Black Boys Look Blue》嘅簡短劇本，靈感來自佢嘅成長故事，簡單嚟講，《月》片故事主人翁舒朗其實就係泰雷嘅第二個自己，而當導演巴利從電影節取得劇本後，舒朗就成為兩個人嘅影子。
泰雷同巴利原本素未謀面，兩人年紀只相差一歲，同樣成長於美國邁阿密公共房屋區，而且曾就讀同一所小學及中學。原作同《月》片中，主角有一個吸毒成癮嘅母親，泰雷坦言呢個係佢自己嘅寫照，剛好，原來巴利亦有一個吸毒媽媽。自己寫自己嘅成長故事，相信原著劇本已經好貼地寫出，黑人孩子成長之痛，家陣連拍嗰個都有同樣經歷，兩人合作，惺惺相惜，交出一部赤裸呈現黑人小孩成長掙扎嘅佳作。
眼神串連3演員
戲中以主角3個成長階段為主線，意味住主角要由3個不同年紀，但又相似嘅演員飾演。兩人目標係要搵最貼地嘅黑人，於是佢哋喺邁阿密街頭貼街招，招募素人演員，成功搵到有一雙無辜大眼、又非常寡言嘅希伯特，飾演童年版舒朗「阿細」；而少年版舒朗，劇組反而透過網上高中學生畢業video作品搵人，並於美國多處舉行甄選會，最後喺洛杉磯搵到曾演出《衝出康普頓》、身材瘦削但雙眼有火嘅桑德斯；而成年版舒朗「黑哥」則是前路易斯安那州嘅田徑之星卓雲迪羅德斯，曾經同影帝尼古拉斯基治合作演戲，該片選角總監拉美尼斯對佢嘅評語係：「你可在他身上看到剛陽和脆弱兩種迥然不同的氣質。」只要你睇咗部戲就會明白佢意思。
《月亮喜歡藍》上映日期：即日
