炎明熹(Gigi)、姚焯菲(Chantel)及一班星夢學員,昨日拍攝劇集《青春本我》,在一場喊戲時出現小狀況,Gigi喊唔出要導演幫忙,更稱鼻涕流得快過眼淚。反而拍擋Chantel輕易飲泣。
Gigi與Chantel一起接受訪問時,解釋為何喊唔出:「平日好少喊,想喊都會叫自己唔好,可能太多鏡頭影住更加難喊,多謝導演循循善誘教導冇嫌棄。(對上嗰次點解喊?)唔記得,負面嘢我又唔想記住。」
姚焯菲詐喊好輕鬆
問Gigi可會上演技課增值,她說:「都想,唔知點解要喊又喊唔出,唔拍時又喺度喊,好想打自己。」原來今日Chantel亦有喊戲:「拍攝時我望住隻公仔,好唔開心咁喊,我又喊得出。」記者叫她「幫下Gigi」,Gigi即說:「冇用㗎,頭先我係鼻水流先。」
雖然有難度,Gigi覺得拍戲好玩,又稱工作人員很好。對於要兼顧事業和學業,她認為:「如果克服到就可以迎接更大挑戰。」Chantel則認為自己有責任演好每場戲:「記對白同讀書差唔多,記住重點融會貫通問題就不大。」