畢彼特於新作《戰爭機器》，以白頭佬look飾演美國將軍。
一講Netflix，或者大家會諗起N套神劇，《黑鏡》、《紙牌屋》及《怪奇物語》等，可以話係一眾美國大台眾矢之的；但今年開始，似乎要怕佢嘅唔止係電視台，事關Netflix今年(尤其今個月起)開始進擊電影圈，相信好快就唔會喺奧斯卡重要獎項見到佢嘅出品(舊年已憑《白頭盔》奪得最佳紀錄片)。今年推出嘅大製作原創電影，繼Robert Redford主演嘅《The Discovery》後，接力嘅有今年頭號新聞人物畢彼特嘅《War Machine》(戰爭機器)。
文：Wing
一見畢佬主演就知道，《戰》片又有佢間「Plan B Entertainment」參與製作，不過，今次係同Netflix合作炮製。呢部戰爭片改編自美國已故戰地記者兼作家Michael Hastings極具爭議性著作《The Operators》。此書之所以引起關注，全因故事嚟自作者喺阿富汗戰場嘅親身經歷。Hastings於2010年4月時，曾於阿富汗跟訪美國軍官Stanley McChrystal，後來將採訪期間錄得嘅逾20小時錄音寫成此書。呢本書一出即時成為熱話，Hastings死前曾於訪問中分享採訪見聞。當時佢話，士兵曾經講笑咁同佢講：「你唔會隊我哋㗎可？」，仲話「如果我哋唔鍾意你寫嘅嘢，我哋會殺咗你。」就喺《The Operators》出版一年多後，Hastings於洛杉磯死於交通意外，終年33歲。
戰場「巨星」
電影版由《野獸家族》David Michôd編導，由畢彼特飾演嘅白頭佬四星將軍擔任主角，從預告可見，電影明顯聚焦於主角將軍McMahon，看在他人同部下眼裡，佢係位相當可笑嘅超自信阿sir，以「巨星」姿態現身戰場，不特止，仲指指點點，自以為是天生領袖。除咗畢彼特之外，配角卡士亦都超強勁，包括《鐵血戰士S》系列Topher Grace、Tilda Swinton、Sir Ben Kingsley及Josh Stewart等。
《戰爭機器》 首播日期：5月26日
《戰爭機器》原著以揭露美軍阿富汗戰爭黑幕為主題，極富爭議性。
演慣正氣美式英雄人物嘅畢彼特，今次轉玩黑色幽默。
Netflix多部已公布嘅新製作，無論係卡士抑或幕後班底都來頭唔小，隨時精彩過美國四大片商喺CinemaCon公布嘅新片單。
奉俊昊引爆Tilda Swinton演技
4年前憑《末世列車》正式打入荷李活嘅南韓名導奉俊昊，今年同Netflix合作推出新片《玉子》，更成為Netflix首部入圍康城影展嘅原創作品(雖然惹起爭議)。奉向來擅於側寫社會殘酷，《玉子》雖然以深山女孩同寵物Okja嘅友情帶入，但主題仍離不開批判社會「階級制」。今次奉更邀得曾於《末》合作嘅Tilda Swinton飾演反派，由佢扮演意圖搶奪Okja嘅跨國公司高層。
《玉子》 首播日期：6月28日
《自殺特攻》拍檔玩科幻警匪crossover
能夠寫出《邊緣特訓》咁好嘅劇本，喺《自殺特攻：超能暴隊》跌一跤嘅導演大衛艾耶，今年喺Netflix推出新作《光靈》(Bright)，當然唔可以睇小。此片喺傳統動作警匪片格局上加入科幻元素，故事發生於一個有人類、半獸人、精靈和仙子嘅平行時空，大衛搵嚟韋史密夫及祖爾艾哲頓，分別飾演人類警察及半獸人警察，雖然兩人誓不兩立，但又要合力保護女精靈及聖物。
《光靈》首播日期：暫定12月
安祖蓮娜新作重現「赤柬」之痛
《非凡生命歷》、《緣海假期》、《In the Land of Blood and Honey》，安祖蓮娜先後執導嘅幾部電影，成績都唔多理想，嚟緊又推出新作《First They Killed My Father》。今次佢同柬埔寨養子Maddox合檔製作，電影以柬埔寨赤柬時期為背景，故事改編自柬埔寨人權維護者Loung Ung真人真事，安祖蓮娜今次特地到當地拍攝，早前更獲柬埔寨國王接見，相信此片值得期待。
《First They Killed My Father》 首播日期：待公布
