【專訪】下屆特首選舉戰幔揭起，同被視為最有實力的兩名司長妾身未明，正休假的財政司長曾俊華仍未獲中央批准辭職，政務司長林鄭月娥取態亦未明朗，已宣布參選的新民黨主席葉劉淑儀則積極備戰，三人的共通點都是政務官(AO)出身，若三人同時入閘，將呈現「三雄鼎立」的局面，香港可能重回「AO治港」舊路。不過，葉劉淑儀強調自己並非純粹公務員出身，自言受過政治考驗及經歷大風浪，更因處理23條立法而嘗過人生最大挫折，言下之意是個人經歷更勝兩名潛在對手。採訪：鄭秀韻 馮振超 撰文：鄭秀韻 攝影：黃文山 鍾式明
葉太昨接受本報專訪時，開宗明義表明不會評論三人的優劣，「唔想再比較，以免俾人誤會我貶低邊啲潛在參選人。」不過，過去曾批評曾俊華「hea做」的葉太，在政綱中不點名批評過去9年政府理財工作停留在「掌櫃」，近日更指對方在任內迴避很多政治爭議，反之葉太少有針對林鄭月娥的言論，難免予人感覺視曾俊華為假想敵，但她矢口否認，並解釋甚少提及林太只因過去曾失言，「我話佢(林鄭月娥)係我師妹，我絕對唔係貶低佢，只係政務官論資排輩，唔想再俾人認為我酸葡萄……」
葉太拒絕品評兩名潛在對手，但自言經歷與兩人有別，「我唔係純粹公務員，我受過好大政治考驗，見過大風浪，同其他兩位舊同事有啲唔同，唔係貶低佢哋，佢哋都好能幹，但我受嘅挫折、受嘅考驗、見風浪，我諗我多過佢哋……」她坦言出任保安局長處理23條觸礁一役，「係人生最大挫折，毫無疑問！」
應改變官僚思維
葉太當年辭任局長後到美國求學，其後返港先後成立智庫及組黨，並接受直選洗禮，從政經驗明顯較兩名同門師弟妹優勝，亦較能掌握民情，她以早前到彩虹邨取景拍照為例，「政府貼滿告示話唔准打波、唔准放狗瞓長凳，(做法)好唔市民友善，長時間喺衙門工作嘅人，唔會感受到！」她質疑政府提供的服務是否為市民謀福利，認為應改變官僚思維，「我哋有民選經驗嘅人，日日同市民接觸，容易睇到點改良政府最基層嘅施政……」
葉太曲線凸顯個人優勝之處，但多個傳媒機構就疑似人選進行的民意調查，其支持度普遍偏低，被問及如何發力爭取支持時，她指民調「有趣」值得參考，但不允透露拉票進展，只重申有信心可取得150個選委提名「入閘」。她並解讀民調結果，指「雙曾」票源重疊，而她則與林太票源重疊，「理由好明顯，林太同我大家女性，各有粉絲，等於當年(07年立法會港島補選)兩太之戰，有啲鍾意陳太(陳方安生)，有啲鍾意葉太」，但她指民意隨時會改變，目前論支持度仍言之尚早，不過，她認為立法會前主席曾鈺成不會出選，因對方與曾俊華的票源重疊。
不會簡單追隨梁路線
政圈盛傳葉太是中聯辦「Plan B」，林太更被指是「梁振英Plan B」，有指兩人都會延續梁振英路線，葉太強調，其個性及背景等使她很多看法與梁振英很不同，「增加房屋土地供應一定要做，但絕對唔會好簡單追隨梁路線。」
至於梁振英治下4年，如何吸取經驗教訓？葉太以打擊「港獨」為例，並不認同特首的處理方法，認為梁振英在施政報告批評港大學生會刊物《學苑》鼓吹「港獨」引起反效果，「第一，你喺施政報告第一段講，咪引啲人留意去睇；第二，係咪太重手？第三，對付港獨，除咗法律上要拉要鎖，仲有分離思想，你要爭取民心……」她質疑，「點解啲人提中港區隔？點解反融合？你點爭取民心？」
她亦暗批現屆政府處理與內地關係不太好，「你睇自由行有摩擦」，更認為處理與內地關係有改善空間，「目標應該係香港覺得雙贏，唔係內地人侵佔我哋空間」，但她補充，「唔能夠怪得梁生，因為上屆政府(對自由行)擴張太快。」
至於特首選戰最終會否有3位建制派候選人，她直言「好難講」，她指人大「831」框架提出2至3位候選人，「因為計過數，(如果)太多人出分散晒、撕裂晒，可能第二round(投票)都唔掂，或者(出現候選人)低票(當選)。」
冀君子「熟女」之爭
上屆特首選舉令建制派撕裂至今，若然今屆出現3位「AO」同場互撼局面，她希望會是一場君子之爭，「我哋幾個都喺建制內，阿John(曾俊華)、Carrie(林鄭月娥)同我幾個都係同門師兄弟妹，大家都係政務官出身，如果競爭太耐、太互相攻擊唔係幾好，所以中央立場希望競爭時間壓縮啲……我相信中央希望我哋雖然有競爭，但君子之爭，唔好過激，唔好人身攻擊，選後唔好鬧晒大交、有過節……」
她又說，「今次一定唔係淨係君子，應該都有『熟女』入圍啩！」但她說，「無論如何，不論性別，大家都吸取教訓啦，上次(屆)搞到刀光劍影，非常撕裂，好多醜聞充斥，我諗今次應該唔會，因為我哋個個都比較乾淨。」
「遺憾無桃花運」
葉太多年前喪夫後，一直無任何緋聞，她不介意公開感情生活，指沒有異性埋身，亦沒有男朋友，「好遺憾無乜，真係成世無乜桃花運！」她強調自己單身，即使有男朋友亦非醜聞，「但我無吖嘛，真係我想搵都搵唔到……(感情生活)唔係空虛，只係講得係平淡，我成世人得一個男朋友，就係我丈夫囉，唔知點解命中註定！」
一向形象硬朗的葉太，甚少展露笑容，她直言「有人叫我笑多啲」，但她說，「我覺得應笑就笑，我唔係完全冇幽默感嘅人，但外國嘅卓越女性領袖，戴卓爾夫人又好，文翠珊又好，默克爾又好，都唔係成日笑，甚至佢哋有啲競選profile相都係表現得佢哋沉思呀，高瞻遠矚、登高望遠，好嚴肅處理國家問題。」
對於其選舉口號「贏返香港」的logo被網民改圖，她承認有關設計引起很多評論，她坦言喜歡「贏」字，但無暇查閱「說文解字」，「如果話『吂』字唔好，點解造字個贏字有咁設計？」至於會否更改logo，她指會交由設計師處理，不會干預他們的創作。
自言誠信無問題
葉太為官及從政多年，被外界評頭品足早已司空見慣，自言若在街上被叫「掃把頭」亦不會生氣。她又指上周公布政綱後，「有人話英文版串錯字、文法錯，或話我搞錯日子，呢啲小嘢，批評我嘅人始終講唔到我有咩特別大失德、或人格好大缺陷，至多話我率直、話我直腸直肚，我誠信真係冇問題。」
今次一定唔係淨係君子， 應該都有「熟女」入圍啩！
