英超大戰｜C朗福仔齊復出曼聯強陣撲賓福特

英超今晚上演兩場大戰，其中，近況飄忽的曼聯作客升班馬賓福特(20/01 04:00)。紅魔上仗英超大好形勢下被阿士東維拉逼和2比2，幸好今場有剛領「特別獎」的基斯坦奴朗拿度(C朗)及拉舒福特等4大主力復出，可強陣訪賓福特。

曼聯自從換上臨時領隊蘭歷克後，整體表現仍未見突破，其中近4場聯賽只得1勝2和1負，且表現不穩。蘭帥最擅長的逼搶戰術及「4-2-2-2」陣式在紅魔一直未能運作良好，而近仗亦漸見該位德國名帥開始「屈服」，適時變陣「4-2-3-1」，令球隊有更多變化。

當然，紅魔上仗對維拉在一度領先兩球下，慘被逼和完場，確實打擊了士氣。不過，今戰賽前總算收到好消息，因臀部傷患已休戰兩場的首席球星C朗，將可與前鋒新星拉舒福特齊齊復出擔正，而兩名肯搏肯纏的防中麥湯米尼與左閘勞基梳爾亦同樣波監刑滿可復出。此外，中場查頓辛祖在上仗輪換後備之後，亦有望重返正選，陣容回復完整，將大大增加贏波本錢。

賓福特經過季初虛火，近期狀態明顯回落，近5場聯賽只得1勝4負，包括近兩仗先後不敵修咸頓與利物浦，排名已跌落中下游。球隊爭勝只能靠上季在英冠光芒四射的前鋒艾雲東尼，但此子來到英超限於級數，今季暫攻入4球已算有交代，但打硬仗卻難委以重任。再者，蜜蜂仔今場人腳亦算不整，中場重心法蘭安耶卡因出戰非國盃缺陣，門將大衛拉耶、後衛查理葛迪及真卡佐真遜仍要缺陣，以他們近期疲弱氣勢，要阻擋紅魔全取3分，恐怕要考領隊法蘭克功力。