效力商台20年的DJ蘇耀宗(細So)，上周五(4月3日)被商台以「因應現時經濟環境狀況及前景預測而作出資源重組」為由終止合約，即日生效，原本晚上7時播出的節目《生活日常》即被取消，改由謝茜嘉、梁文禮主持的《叱咤樂壇》頂上，由於事出突然，細So未有機會在節目中跟聽眾告別，惟有在網上做直播，交待狀況及心情。
細So昨晚表示：「好多謝呢兩日好多朋友慰問，好擔心我有冇經濟壓力，不過又冇想過幫我，純粹只係問吓，又冇諗住幫我嘅，我話：『有呀、有呀』，佢哋就話：『哦，咁呀，辛苦你喇』咁就算數……有少少想分享，我有個舊同學Group，我好少傾偈，好多人同我講加油、俾心機，support you，唯獨有個留咗句『點解你咁㗎，咁大個人都唔改吓㗎，成世人都係咁。』反而呢句我覺得幾開心，笑得最開心……有一年參加運動會玩標槍，原定每人有3擲，不過負責嘅老師話『因為時間關係，我哋得兩擲』，我就據理力爭，老師嬲到追住我喺個運動場度跑，想打我，我倒後跑，但係都跑得快過佢。最尾嗰個阿Sir係被另外兩個阿Sir笑住口咁撳低咗，打唔到我，但堅嬲！有一日我喺社交平台收到一名師弟inbox，向我了解呢件事真偽，我順道託對方向該老師致歉。回顧過去，好慶幸我睇番過去咁多年，我個人係冇變過，呢個係我少少分享。」之後細So自彈自唱Jim Croce的《New York's Not My Home》，並叫網民自己領悟歌詞中的意思。
有指細So早前曾跟上司衝突，他表示因為疫情，跟公司在處理衛生細節及是否需在家工作，產生意見分歧，有指他得罪高層被請食「無情雞」。