張敬軒把早餐印上身。
張敬軒的演唱會昨日來到第二場，馮韻謙、鄭欣宜、Dear Jane 、湯怡、李靖筠、陳家樂及容祖兒媽咪等也有到場支持。他在第4場換了一件黑色西裝，後面更大玩透視，他更搞笑說道︰「呢一個咁嘅背脊，一粒瘡都冇，就係日日食白粥同麵包食番來！我直情開始食到有啲妊娠紋！」觀眾掌聲笑聲如雷，軒仔無奈嘆謂: 「你話唱得咁辛苦為乜，遮遮重多掌聲過我。」
張敬軒大玩透視裝。
軒仔的背脊全靠「遮遮」的早餐。
軒仔在演唱會上大談他的工人「遮遮」，指對方曾長時間在台灣工作，懂國語，於是請她來是希望用作照顧來港一同生活的父母︰「我爸爸媽媽都唔識講英文，同事叫Vincent，佢哋就叫人『溫神』，所以諗住請個識國語姐姐照顧，可惜因為疫情關係，父母來港計劃一再拖延，我地已經11個月冇見面，只能通過視像傾電話。」
今年對大家來說都不易過，軒仔也是一樣，與父母分隔、家庭有幾位親人離世，小狗生病確診漸凍症，就連工作都充滿考驗︰「好多時候都唔知自己有冇工開，喺音樂道路上可以點樣行，其實你哋經歷到，我都係一樣。喺開騷之前，仲收到一個網民留言，有位歌迷舊年買咗飛，今年離開咗嚟唔到。我唔知佢嘅家人今晚有冇嚟，希望佢在天之靈 ，聽到我哋今晚歌聲。」
軒仔續說：「今年所有發生嘅事，都話畀我哋知，幸福唔係必然。我覺得就算經歷咁多唔開心，做人都唔可以一直俾情緒干擾自己，唔可以每日掹大對眼，只係帶住傷痛。」 軒仔表示PO早餐上網原本沒有特別意思，他表示只想讓大家知道一位知名歌手的早餐，隨時不及別人的早餐好。他說︰「有好多朋友留言，今日做嘢唔開心，睇完我個Post好咗好多，生活係咁樣，當命運，時勢唔夠好，就要自己搵一啲快樂，搵一啲滿足感俾自己，慢慢，你就會發現身邊其實擁有好多愛，同時你亦可以令身邊人感受到愛，咁樣我哋先可以為社會帶來改變。你哋多謝我啲早餐post，我反而好榮幸可以通過我嘅不幸為大家帶嚟咁多娛樂，只要大家開心，我就開心！」