有的士司機日前因使用GPS，被乘客嘲諷「早知唔上車」。(資料圖片，示意圖)
本港道路網絡雖然四通八達，但並非每次行錯路都能很快修正，因此不少職業司機即使自問熟悉各區，可能都會以GPS(全球定位系統)導航輔助。有的士司機日前接載客人時，因不熟悉附近環境而打開GPS導航，詎料被乘客質疑「司機你唔識路㗎」，他頓時向乘客坦承「唔多熟點出返去」，對方竟反嗆「早知唔上車」。事主表示聽到這句說話後，立即以一句「咁冇所謂呀，你鍾意嘅而家呢度落車唔收你錢啦」回敬，對方最終安靜乘搭餘下路程。
事主認為問題源於對方的修養，直言自己如有行錯路，定必會為客人扣減車資，又透露每當聽到有人說類似「你揸得的士唔識路」的說話，「聽到呢D(啲)就火都黎(嚟)埋，一定同佢詳談吓。」
不少網民都力挺事主，指不明白開GPS的問題何在，「香港路不是個個都知在那(哪)處，老屎忽有時都想不起」、「唔識路用GPS又有乜問題，保障大家啫，準確到達目的地，客冇嘥時間，司機收足錢，大家happy(開心)就得」、「客就係咁神奇，佢地好似當全部司機都識晒全香港既(嘅)路」。
事主其後又補充，間中有乘客見到他開GPS後，反而會主動帶路或提供行車路線。另外，有人建議遇到類似情況後，扮演「九龍車」可能效果更好，「你應該同佢地客氣講我是九龍車香港路不熟可否帶我行，萬試萬靈。佢地有得威，就算行不對佢地都不會詐型。」
