美國節目《American Idol》著名主持人Ryan Seacrest的前造型師Suzie Hardy，今日指控曾被佢性騷擾長達6年，但為咗養育子女，忍氣吞聲。據娛樂週刊《Variety》報道，Suzie係單親媽媽，2006年開始為Ryan喺《 E! News》節目擔任stylist，佢聲淚俱下表示：「Ryan對我的性騷惡行自2007年開始，一直持續到我被迫離職，時間長達6年。」
Suzie話，Ryan有時只著底褲，喺佢面前「一柱擎天」，又對佢私處毛手毛腳，有次更大力打佢pat pat，力道之大，喺數小時後仍見手指痕跡。Suzie係喺2013年向人事部主管投訴此事後被解僱。
去年11月Suzie向美國國家廣播環球集團(NBC Univeral)同Ryan發出律師信，指控Ryan多年來侵犯佢。NBC Univeral隨後聘請獨立諮詢人士，對指控展開內部調查。今年1月以蒐證不足，駁回Suzie嘅指控。
Ryan較早前已透過律師否認指控，更踢爆Suzie曾要求支付1,500萬美元(約1.17億港元)掩口費，Ryan選擇主動公開此事。