「東涌羅浩楷」利愛安（Kirsten）縱然落選2021年香港小姐競選，但獲TVB賞識簽約成旗下藝人，更安排佢擔任明珠台資訊節目《Top 10 Anything》主持，及加入處境劇《愛·回家之開心速遞》飾演Liza（姜麗文飾）外傭好友Naomi，與姜麗文雙雙獲網民大讚扮外傭姐姐扮得勁神似。不過，由於姜麗文戲份減少，利愛安出鏡機會亦自然減少，已有近半年無喺劇集露面，即使有Liza與姊妹們嘅戲份都唔見利愛安蹤影。
與男友人相當親暱
不過利愛安仍於TVB官方網站女藝員名單之中，近日與哥哥Lenar返菲律賓探親，期間更遊覽菲律賓嘅中國海軍軍艦「戚繼光號訓練艦」，從照片中睇到利愛安曬到鼻頭都紅晒，但仍擺出親切燦爛嘅笑容，睇嚟相當開心。原來，呢趟旅程並非只有利愛安及哥哥，仲有一名男友人同行；利愛安仲與呢名男友人態度相當親暱，拍照時除咗頭貼頭，男方更做出搭膊頭及撓手嘅動作，而利愛安就喺留言以「Honey」稱呼對方：「with my honey and my bro」，疑似高調放閃。
原文刊登於 Yahoo 娛樂圈
