林嘉欣指，與珊珊在拍攝現場大談「湊女經」。
李麗珊和林嘉欣今日出席記者會，大談現今養一個孩子要600萬。二人第一次合作拍廣告，但默契十足，更在拍攝現場大談「湊女經」，林嘉欣說：「同珊珊拍廣告好難忘、好投契，埋位同唔使埋位期間，都係傾湊女經，珊珊佢啲女入晒大學，我仲要慢慢捱，呢次好開心同佢合作，覺得佢好親切。好多年前珊珊拍廣告講生囡要400萬，聽到我好驚諗住唔生，最終自己都生咗兩個，使咗幾多真係唔知，總之平有平養、貴有貴養，有需要都要使嘅。」
珊珊與林嘉欣首次合作拍廣告，大談現今養一個孩子要600萬。
林嘉欣：我淨係識湊女同拍戲
廣告中珊珊教林嘉欣玩風帆，她表示兩個小朋友各有興趣，大女鍾意寫故事、畫漫畫，林嘉欣續說：「可能佢受爸爸影響，因為爸爸有寫劇本；細女就鍾意游水。我淨係識湊女同拍戲， 我唔識理財，係咪好唔似呢？所以呢啲數字嘢，我要專業人士幫手。」談到參演電影《美國女孩》於《第40屆香港電影金像獎》獲獎，她表示因為早瞓而未有看直播：「我有恭喜導演，佢將媽咪呢個重大角色交俾我演，當然好開心啦，好榮幸可以參與，得到呢個圓滿成績替佢哋開心，今晚應該會慶祝。」
昨晚《金像獎》頒獎禮，林嘉欣表示因早瞓沒有收看直播。
