美劇《色慾都市》(Sex and the City)中飾演律師Miranda Hobbes嘅女星仙菲亞尼克遜(Cynthia Nixon)，昨日傳出有意參選下一屆民主黨紐約州長初選，更招攬兩名曾幫紐約市長白思豪Bill de Blasio助選嘅大將加入自己競選團隊。佢發言人表示，「目前仍在評估中，一旦確定，會向大家公佈。」又話，好多紐約人鼓勵仙菲亞競選！
51歲嘅仙菲亞12歲踏入演藝界，1998年起參演《色慾都市》，更獲得艾美獎。2003年同育有一子一女嘅前男友Danny Mozes分手後，同陪伴佢治療癌症嘅Christine Marinoni拍拖，並於2012年登記結婚。仙菲亞常以同志身分爭取同志平權，去年8月就曾傳出佢今年或會參選紐約州長。