金多寶｜反傳統喊多過笑金燕玲超錫鍾雪瑩有原因呂爵安李尚正再合作超開心

新春賀歲片《金多寶》由金燕玲、鍾雪瑩、呂爵安(Edan)、李尚正及楊詩敏主演，內容圍繞住六合彩金多寶的故事，令不少網民人聯想起《富貴逼人》系列。然而前者是大放笑彈，今次《金多寶》一反傳統，跟大家談生離死別。翁子光用來紀念祖母的作品，把兒時跟嫲嫲相處的時光放上大銀幕。對於由外婆、嫲嫲一手湊大的觀眾來說，感覺會特別深。金燕玲在戲中跟鍾雪瑩的嫲孫演繹，相信會讓大家喊濕幾張紙巾。

D5BdenVWIRZl8ZY8wui62Cj0sTSNTnnp1UcNetVHDXo

阿雪戲裡戲外乖乖女

金燕玲從影以來首次拍賀歲片，跟戲中多位演員都是第一次合作，她自言之前從沒有看過他們的作品，只是知道合作後上網了解一下他們的背景，但她對阿雪印象極深，促成二人在戲中的真摯情感。她直言對阿雪是打從心底喜歡，全因兩次的相遇。

她說︰「兩年前一個飯局，係陳茂賢帶我去，當時人人出咗去，得返我同阿雪兩個，佢好遠走過嚟自我介紹，陪我坐。我係知佢係邊個，因為蘇施黃睇完《填詞L》讚過佢，我對佢有啲印象。我知道當時佢係嚟陪我坐，另一次又係電影宣傳，人人又走開晒，佢又再陪我坐傾下偈。我就覺得呢個小朋友好有心，佢純粹見一個老人家坐喺度，陪下我、照顧我，我對佢印象好深！當我知道佢係扮孫女，我就好自然同佢有一個bonding喺度，我係好錫佢，因為本身我已經好鍾意佢，所以我冇同佢特別溝通。」

從來按自己方式演

金燕玲自認氣場大令人不敢埋身，加上從來都不太愛跟別人溝通，過去只會按自己的意思去演，就連今次也是一樣，從沒有跟導演了解他的嫲嫲是怎樣。阿雪指其角色原形是翁子光，因此有問導演跟嫲嫲的相處往事，有時拍到某場口，翁子光會再分享更多自己跟嫲嫲的點滴。對於翁子光找阿雪演自己的故事，Edan驚爆導演憂找靚仔男演員會被人指自戀，相反女演員能避開這個問題。金燕玲認為無論男或女演繹也好，最重要是投射出來的那種感覺。她指這齣電影希望令觀眾笑中有淚，喊的場口不是為大家帶來悲傷，而是溫馨。

初演人父被考起

李尚正首次扮演父親角色，他坦言好難，因為跟阿雪似朋友多過父女。他說︰「我係了解唔到，我係無演過老竇，自己都唔知點樣，我有啲懷疑現實中都未必係稱職老竇。我就覺得阿雪唔會覺得有老竇。」阿雪認為自己跟阿正及蝦頭的年齡難以令人聯想到他們是一家人，幸好有小演員李鎧霖扮演細佬，才令一家人的感覺更完整。

阿正跟Edan成為今次的搞笑擔當，Edan直言在阿正面前只是螻蟻。談及戲中一場扮鬼的戲分，笑料十足，阿正表示「喜劇係需要唔同input！係應該要！」金燕玲好奇問道有沒有試過拍完覺得不好笑，阿正說︰「每一次都係，好多時都覺得會cut，但最後有啲又會出街。」

跟阿雪誤會大了

對於兩度合作，阿正覺得Edan表現很好，「之前同佢拍《死屍死時四十四》，佢好緊張，今次真係好自然，可能同佢投入有關。」Edan則非常享受今次拍攝過程，有別上一次因為太過緊張只專注在自己身上。

談及戲中Edan跟阿雪的感情線，二人驚爆大家擺了一個大烏龍。Edan一直以為角色是關心阿雪，跟她有曖昧關係，「不過拍咗一、兩日，佢係無同我曖昧打算！」阿雪就指自己接收了錯誤的訊息，「導演同我講唔係雙方向，所以我有啲誤會咗！但去到最後導演又諗到其他嘢，就變成依家個版本！」

有錢不等如快樂

問到現實中如真的中了六合彩會怎樣做，Edan二話不說表示會「做定期」，阿雪則打算捐出部分，其餘便偷偷過數不同朋友，為他們帶來驚喜。然而，如果中了六合彩要像《金多寶》的角色經歷不少災難，阿正坦言現實中有不少例子是改變了中獎者的性格，搞到眾叛親離，而金燕玲坦言金錢是從沒有人會嫌少，也可解決不少問題，但金錢未必真的為人帶來快樂。她說︰「我生過病，錢係幫到睇醫生。錢係咪令你快樂呢？當然無人會抗拒好多錢，但如果有咗(錢)之後，你個人會唔會變呢？係咪令到你即刻唔做嘢呢？錢係會令人會變，究竟變成係點呢？對我嚟講，錢多咗的確係會好啲，但最希望人本質唔好變，本質好緊要。」