胡楓回應羅蘭黃昏戀多得太太生前點醒不介意由影壇男一轉型做綠葉

TVB全新網絡系列《電視城內》日前隆重登場，頭炮請來縱橫影視界73年的胡楓（修哥），細說「胡楓的電視故事」。修哥在節目中除暢談加入無綫因由、在無綫工作多年的難忘和開心事，及對工作的看法外，還大方回應了與羅蘭的「黃昏戀」及是否曾跟傳奇人物李小龍切磋過的傳聞等。

根據tvb.com報道，94歲的修哥入行前其實是古董店太子爺，惟對做生意一點興趣也沒有，直到1953年（21歲）因一個機會膽粗粗投考男演員，結果幸運地被「大成公司」錄取，從而展開演藝之路。

修哥首部電影即擔正做男主角，由50至70年代合共拍了200多部電影，產量驚人，叫好叫座作品包括《難兄難弟》及《青青河邊草》等。惟60年代後期，粵語長片式微，修哥因譚炳文牽線轉戰TVB。事緣某天修哥在餐廳吃飯，譚炳文突然走過來問他：「佢話你有冇興趣做電視呀？入面有三個高層想同你傾吓偈，我咪過去傾偈咯，嗰三個高層話你做《歡樂今宵》好冇呀，呢種新嘗試我又想做吓。」大無畏的修哥，又謂當年全靠太太一句說話點醒，令他即使由電影男一轉戰電視做綠葉，也可樂在其中：「我太太話，你既然鍾意做，又咁多年經驗，就唔好嘥咗佢，你鍾意做就做啦，冇所謂嘅，俾佢一言驚醒。咁我咪做電視咯，做人爸爸、做人咩都冇乜所謂，我亦唔覺得自己無咗主角係一件好遺憾嘅事，我只係覺得有戲畀我做，我就盡量做好佢。」

談到轉型後的工作，修哥直指忙到不得了，皆因要同時兼顧《歡樂今宵》、劇集及處境劇的拍攝工作；但「活到老做到老又學到老」的修哥，笑言是愈忙愈開心，並透露當年全盛時期收入可觀：「愈忙我愈開心，多show呀，喺電視嚟講都算係搵得幾多。」並感恩加入電視圈後得著甚多：「做電視真係俾咗好多嘢我，俾咗好多新朋友我，粵語片時代哩，來來去去都係嗰班人，但電視嚟講不斷有新嘅人入嚟，呢樣係我得著。」修哥又笑言近年最享受的工作是每逢新春扮演財神，皆因「好受歡迎」，足證修哥為人愛熱鬧。

修哥太太呂詠荷在2016年不幸離世，由於他多年來跟羅蘭經常在節目中扮演一對，私下又相當老友，繼而傳出「黃昏戀」消息，而「胡楓娶羅蘭」更一度成為內地網上平台熱搜。對此，修哥在節目上表示：「真係都唔知點嚟，傳咗幾年，傳到依家都傳緊。不過唔緊要，90幾歲都仲有新聞好難得㗎喇！聽講呢個消息係大陸傳出嚟，即管傳落去啦，多啲新聞仲好。」胡楓在鏡頭前大拋專業bite。