MIRROR成員AK 江爗生（Anson Kong）今日（8日)現身旺角出席香氛噴霧產品發布會，AK自言向有噴香水習慣，認為獨特的香味能讓人留下記憶點，談到誰是MIRROR的「香香公子」，他就首選明天生日的陳卓賢，「由比賽開始已有噴香水習慣，一睇就知係公子哥兒，懶係有高端氣場，噴香水先啱佢性格。」問到可考慮送香水作禮物，他就得戚地擺擺手不作回應。
談到人生第一次買香水，原來是為了出席中學謝師宴，他笑言：「『舊年』中學畢業去Grand Dinner，買咗我人生第一支香水。」他自言非常重視，穿恤衫打呔配牛仔褲盛裝出席，問到是否迷到不少女生時，他就自爆：「我中學一啲都唔受歡迎，啲女仔仲有啲討厭我，我把口賤成日得罪女同學，所以我中學時期絕對唔係風頭躉，我做dancer嘅時候都唔算受歡迎，真係入咗行先開始受歡迎，終於搵到知音。」談到謝師宴最難忘回憶，竟然經歷人生第一次飲醉酒兼斷片，晚上於元朗聚餐，翌日醒來在同學深井屋企，醉到不醒人事。
AK今個月忙於舞台劇《The Magic Hour魔幻時刻》，他表示跟謝君豪有很多對手戲，感激豪哥悉心指導，獲益良多。他又透露首場公演時，他蔡曉童要走到台下與觀眾互動，「啲觀眾指咗我阿爸出嚟，我望一望咁似我老竇嘅，咁我就話唔好搞佢，我哋搵第二個啦。」他自言暫時感覺不錯，比去年首次演舞台劇放鬆。
談到早前獲金庸次子查傳倜點名讚有楊過氣質，他由衷感謝，「希望可拍到金庸先生嘅作品，可成為其中一個筆下小說角色，係人生一大check point。」他自言因自小聽外婆講金庸小說和中國民間傳說故事，深被吸引。問到最想演的金庸小說角色，除了楊過，最想演有七個老婆的韋小寶，「我拍咗戲一段時間覺得有樣嘢需要改善，我同男仔演對手戲冇問題，但同女仔演戲有啲怕羞尷尬，我要克服呢個問題，一試過咁多個女仔，係最好嘅訓練方法。」問到可介意剃頭演韋小寶，AK表示如果為咗拍戲完全冇問題。