Theresa在40歲那年，除了改名外，亦皈依學佛，跟過去的自己說再見。(周令知攝)
傅寶誼(Theresa，前名傅穎)由出道至今，圍繞在她身上的都是負面新聞，最近她在某節目中重提公司迫她在媒體面前公開認錯一役，是打擊她人生最大的一件事。節目出街之後，Theresa又再次被網民攻擊，彷彿她做甚麼、說甚麼永遠都是錯。過去的她，曾被迫妥協、被迫承受不同指控，去到40歲的那一年，因為一件事，令她不再執著，決定忠於自己，突然豁然開朗，正如她的新作《成年禮》一句「終於我學會了天黑 也別怕」。
謠言止於……？
40歲是Theresa人生的轉捩點，她在生日當天選擇皈依，在寺院修行的時間，她體會到要活在當下，「每個人都會講，但真正領會到嘅人係好少。真正活在當下嘅人，其實佢完全唔會有憂慮或者不開心情緒。」她形容40歲前的自己一直在做實驗，跌跌碰碰好多次，這些經驗累積下來，令她知道人生的遊戲是怎樣去玩，開始真正享受人生。
看書是Theresa過去幾年提升自己智慧及EQ的方法，當中莊圓法師的《因果的真相》對她影響甚深，她相信因果，相信人來到世上是為了消除業力，既然負面新聞衝著她而來，她就欣然接受。她說︰「我個file真係成尺厚！新生代未必知，但90後嘅人一定知我好多謠言，到依家都未停過。(有冇諗過點樣制止下？)無，人生係苦多於樂，幾開心嘅人都好，每個人都有自己嘅苦。」現在的她，相信一切都是上天安排，不再執著這些是非，「想做咩就去做，唔好諗人哋點睇，100年之後，人哋都唔識你。」
渴望有人愛
Theresa直言不善與人溝通，她相信與兒時經歷有關，「5歲嗰年，我喺屋企係可有可無咁，心入面有好多想法，諗點解媽咪錫細佬，點解冇人錫我嘅。我7歲嘅時候，跪喺床上祈求媽咪可以愛我多啲。依家睇返呢個動作係好心噏，細個嘅成長環境令到我好自卑，令到我唔敢主動去同人傾偈，我係一個好被動嘅人。」不過，因為接觸到直播帶貨，令她學會從別人身上思考，學會主動分享，於是利用網上平台把自身的經歷跟大家分享。
在其社交平台有不少談自身經歷、人生道理影片。其中一條片是她想跟20年前自己打氣，內容是不要懷疑自己、不要迫自己討好別人、不要對任何人都翻開肚皮甚麼都跟別人說、唱歌不是自己的天賦、不要理會流言蜚語……看過片的人都隱約感受到Theresa當時只是一個初出茅廬的女仔，要撐過大量閒言閒語絕不容易。
真心不能換真心
她坦言人去到某一階段，會有一些覺悟，認為人在某些環境是需要保護自己，否則只會不停消耗自己。「細個會有一種諗法係以真心換真心，我真心對人，人哋應該係會感受到，都會真心對你。但係，我哋嘅成長歷程中，係未必會有相同對等嘅回應，喺人哋心目中，你講嘅說話會有反效果。所以，要學會的是人性，如果你一直都唔知人性嘅話，仲用呢種諗法去交朋友，傷害永遠都係自己，要跳出呢個環境，搵一個匹配自己磁場嘅地方。」
她自言是高敏感的人，當年的是是非非令她十分困擾，自己很介意別人的說話，令她不停內耗，「我想同所有人講，真係唔好介意人哋點睇自己，介意係因為我哋唔了解自己，要知道人哋對你嘅睇法其實都未必係真相，只係以佢嘅認知去判定你係咩人，但係同事實會有差距。佢哋帶住咩情緒去睇你，會將佢自己嘅情緒投射喺你身上。如果所有嘢都要就人哋，自己會好攰。」
Theresa現在寧與自己同一頻道的人做朋友，她現時很清楚要的是甚麼。真心朋友不用多，一個都夠。(周令知攝)
多謝Cookies
早前Theresa在訪問直言跟Cookies其他成員「不是朋友」，只是同事，這個關係更只限是在Cookies那幾年，之後並無交集。當年，Cookies令她成名，也令她是非纏身，回望過去，她沒有討厭曾成為Cookies的一員，「我非常多謝Cookies，令我有一啲名氣，如果唔係，我呢啲十年都唔出現嘅人，大家可能忘記咗我。Cookies係我一個開始，回想嗰個年代，有好多歌創造咗大家嘅童年回憶，依家你哋聽返《心急人上》都會去返以前小朋友身份，會跟住唱，證明呢首歌好成功，為大家帶嚟歡樂。」
Cookies要齊人很難了，Theresa直言跟其他成員沒有聯絡。
Theresa相信一切都有安排，每個人都有自己的劇本。(周令知攝)