陳山聰、陳展鵬黑白雙煞造型登台。
昔日在無綫劇集《超能使者》、《乘勝狙擊》等多部作品中合作無間的兩大視帝型男——陳山聰同陳展鵬，日前齊齊殺入越南開演唱會！兩人主演的劇集一向紅遍海外，在越南更擁有大批忠實影迷。不過講到「雙陳合體」登台唱歌，原來今次是破天荒第一次，難怪令當地粉絲全場瘋狂！
陳山聰、陳展鵬首度世紀合體開騷！
一向走在潮流尖端、視「貪靚」為終身事業的陳山聰，今次登台造型絕對冇令人失望。他特別挑選了一套全白西裝套裝上陣，一出場就宛如「白馬王子」降臨，型格十足！山聰全晚心情大靚，在台上瘋狂向觀眾「派心心」，實行用電眼迷倒全場。唱到興起之際，更大方走落台下同粉絲近距離互動。此舉頓時令全場陷入瘋狂狀態，熱情的越南粉絲隨即一擁而上，將山聰層層包圍，一度引起全場哄動，足見佢喺當地嘅超高人氣！
陳山聰特別挑選一套全白西裝套裝上陣，宛如「白馬王子」降臨。
提到今次跟展鵬首次合作開騷，山聰說：「其實我同展鵬合作過好多電視劇，但今次一齊做音樂會真係第一次！大會仲專登搭咗個四面台俾我哋兩個。我哋拍劇已經好有默契，估唔到原來唱歌都一樣咁合拍，連我哋自己都好期待下一次嘅演出！所以今次我哋兩個特別揀咗首《左右為難》合唱。至於影視上，我同展鵬當然可以、亦都好想再合作啦！」
