湯令山考車肥佬4次誓要考到為止保護愛苗避談戀情讚林熙彤風趣幽默

湯令山因為4次考車都未能合格成為網民熱話，有人上載他在MV揸的士的樣子，湯令山即搞笑留言說：「本故事純屬虛構！」不少網民及朋友著他疊埋心水call Uber，亦因為他考車屢次肥佬，促成他與Uber的合作，昨日在西九文化區開記招。他坦言自己考了車幾年，只想合格，所以會考到得為止，現在只好搭多些Uber，並稱日後合格也會繼續Uber。

湯令山說：「感覺好渣，我要努力啲。每次衰嘅嘢都唔同，好多朋友都俾咗唔同建議我，我每次都有聽，每次拎個成績返嚟都係錯唔同嘢，所以我覺得最大嘅問題係我自己做得未夠好。我覺得可以再努力啲！」他亦指身邊有朋友叫他不要再考，他坦言只求合格，「我考到都未必會揸，都係坐Uber！」他更做足代言人本份，不停大讚Uber的好處。他坦言日後再肥佬不會分享給大家知，直至考車合格才會公布。

自己問題考唔到車

他提到創作《早到的U》的時候，「已經fail緊」，他指歌詞內有提Uber一字，於是打算歌名叫「早到的Uber」，但後來發現不能這樣出，遂以U代替Uber。及後Uber發現這首歌便與他合作，可說是塞翁失馬，焉知非福。他又苦笑表示可能自己考車失敗才能換到今次合作。

問到下次考試日期，是棍波還是自動波，他表示是秘密不回答，但坦承有換過司傅，「其實唔關佢哋事，深思熟慮係我問題，我未準備好，所以pass唔到。同埋發現有啲嘢大家可能覺得好簡單，但我就覺得唔簡單！今次我發現駕駛同睇路係我短處。」

避談戀情

他表示考不到車，不會阻礙到他追女仔。談到女朋友如有車牌便可以，湯令山鬆鬆膊頭示意認同，再問到是否暗示自己蜜運中，他說：「呢個唔得呀？呢個問題問得唔好，問得太刁鑽，冇諗過你會咁樣問！有冇拍拖，同邊個拍拖都唔想多講，俾多啲空間我！唔該晒！」至於如何看林熙彤（Hazel），他笑謂「風趣幽默！」談到女方也是這樣形容他，「係呀，我都搞笑嘛。」

大方回應抄襲風波

有指他在5月20日「我愛你」大日子派歌《玻璃》，正是向Hazel示愛。他指歌曲早在2年完成，當時「冇諗住邊個寫，可以係送俾粉絲。」對於歌曲推出後，被指跟美國歌手John Mayer於2013年推出的名曲《Walt Grace's Submarine Test, January 1967》極為相似，因而捲入抄襲爭議。湯令山大方回應說︰「我有去聽番John Mayer首歌，因為一樣Key，所以都有啲似，講真流行曲得5個音，旋律好簡單，純粹係機緣巧合，之後推出的歌都會俾公司唔同人聽聽，避免再有類似情況發生。」他表示今次是很好的學習機會。

多年時間準備紅館個唱

至於將來會否不避嫌，找Hazel做MV女主角？湯令山說︰「因為要籌備來年1月紅館演唱會，之後推出的都唔會係情歌，MV都冇乜女主角。」他續指來年1月紅館演唱會對他很重要，坦言自九展完成個唱之後一直在籌備，「今次有個機會可以上紅館，真係好開心。呢個show對我嚟講真係好緊要，一路都喺度諗緊，之後落嚟出嘅歌都係為咗呢個演唱會嘅。」

他表示有些歌曲會涉及打架元素，至於會否在演唱會上加插打交或邀好朋友上台一齊打，他思考了一回便說：「問下佢哋先！」更搞笑自己是朋友之中最打得，並著大家留意接下來推出的MV，將會預告紅館有甚麼元素。