許廷鏗投資七位數開診所再籌備開騷憶首次搭飛機喊到幾乎要打鎮定劑

歌手許廷鏗（Alfred）與「廿四味」成員李凱賢（Brian）昨日（28日）現身九龍塘又一城，出席新西蘭貿易發展局與超級市場合作的年度活動「味遊新西蘭」，兩人在揭幕禮上更以現場直播帶貨，開箱試食多款新西蘭美食。

許廷鏗年僅兩歲時已跟家人同遊新西蘭，他對當時吃了什麼已沒有印象，但好記得自己搭飛機時全程爆喊：「因為我好細個，係我第一次搭飛機，所以搭飛機嘅時候，我聽聞係喊到幾乎打鎮定劑，係有啲誇張。」笑言年幼時已注定做歌手鍛鍊氣量。Alfred還記得當抵達新西蘭後，家人帶他到雪山結果亦敗興而回，當時他一踏足雪地，雙腳慢慢沉下去，嚇得他不停喊，最終媽咪要抱回他上車，搞到媽咪無法滑雪。

期待欣宜復出

被問到近期是否多打pickleball體型變弗？許廷鏗表示：「fit咗呀？其實我fit唔fit呢個話題都講咗好多年，有時fit、有時唔fit，我都冇乜所謂，唔好理肥瘦，最緊要健康啦！」許廷鏗與任職醫生的胞姊開設一站式診所，由於店外玻璃已印上「許廷鏗牙科醫生」，最近已成粉絲打卡熱點。他表示剛從診所過來出席活動，自言唱歌、做牙醫同樣開心，Alfred坦言今次投資過七位數：「好貴啊！開診所好貴，最近去咗個牙科展，去添置一下新科技同儀器去呢個診所，希望可以提供更好嘅服務。」確保每位客人都能得到尊貴的醫療服務。

音樂方面，Alfred透露確有開show計劃，自言近月來好忙，既開診所又要開騷，並預告：「下年啦！大家等消息。」有望在明年4月生日前後再踏舞台。至於鄭欣宜經常在街頭被粉絲「捕獲」，談及好友何時復出，許廷鏗笑謂：「我都想知呀！係咪蓄勢待發？佢精神狀態飽滿就不嬲都係，佢對自己很好，會搵可以令自己開心嘅嘢食，我見到佢近排好似身型fit返，所以我都期待佢蓄勢待發，同大家一樣都係等緊消息。」Alfred因忙於準備診所開業，所以最近大家比較少見面，但仍有保持聯絡，不過只在WhatsApp群組及社交網互動，不時會收到欣宜轉發來的有趣影片。

另外，Brian與「伍姑娘」伍詠薇主持的HOY節目《九運會客室》已添食第二季，安排10月開播，到時會有令人意想不到的娛圈「失蹤人口」做嘉賓，目前第二季節目已拍了四成，Brian自言在鏡頭前毫無保留，定必為觀眾帶來驚喜。