林盛斌(Bob)由DJ轉戰幕前，再涉足婚禮司儀、開公司搞娛樂事業，今年初更當上男主角，近日再度主持《女神配對計劃2》引來全港關注。與此同時，他又要為個人巡迴棟篤笑忙於籌備，用搏命去形容Bob絕不為過，所以他用《BOBMAN搏命先生》命名人生第三個talk show。
《BOBMAN搏命先生》將移師不同城市，預計2027年再返香港埋尾。
談起Bob的搏命時刻，相信離不開TVB兩個整蠱節目︰一場惡搞的婚禮、一場亡命飛車籌款。Bob兩次都是在毫不知情下拍攝，遇到每一個難題，他依然想盡辦法去完成，拼盡做好表現，令旁人認為這些成就Bob今時今日的事業。他說︰「我喺社會工作廿幾年，大家應該睇到我演出有幾盡力嘅。見到某個節目我好搏命、好盡力，其實唔係一次半次，係好多嘢係積聚返嚟，有人諗起你，先至有個啲節目。亦因為呢啲節目，大家見到我好拼盡，會全力以赴，所以再俾多啲機會你。唔可以因為一、兩次搏命而就覺得自己係搏命先生，而係有一份堅持、打不死的精神。」
信搏盡終獲認同
Bob的事業現在順風順水，其實背後付出也不少。對於網民至今仍不時劣評他，未獲得眾人認同，Bob自言近十幾年提醒自己不要因為某些留言被擊倒。他說︰「就算你幾落力，一樣有人唔喜歡，討好唔到某啲人。呢啲時候，就要相信自己做嘅嘢，為自己事業去搏命係應該，希望有日打動到，總有一日令你對我改觀。唔好因為兩、三個留言影響到自己心情，要放心機、時間落去支持你、留意你嘅人。」
Bob曾有一段時間糾結自己沒獲得所有人認同。(周令知攝)
爸爸的無力感
儘管Bob一直表示要保持正能量，他直言入院做通波仔手術前一刻，無力感湧上心頭。「當時阿仔好似出咗世無耐，啲女仲好細個，佢哋問我去邊，我仲安慰話無嘢嘅，做個小手術。大家逐一攬攬，個畫面好似送別咁。就算幾正能量都好，都有諗過攬完呢一下以後見唔到。嗰次畫面真係幾震撼……手術好似好普通，但都有機會死，嗰時我40歲都未夠，真係淆底！」
隨著子女漸長各有朋友圈子， Bob坦言現在希望子女多花些時間陪他。「以前我會諗點樣努力做好星期一至六嘅嘢，星期日就family day。依家係要求佢哋有時間陪下我，呢個又話睇戲，嗰個又約咗朋友去camp。但呢個係成長一部分，見住佢哋成長，依家大個女，個仔又愈來愈大，真係風水輪流轉，依家唔係佢哋希望爸爸陪伴，而係我希望佢哋可以陪我星期日去玩。」
Bob坦言現在會求子女留些時間給他。(周令知攝)
收埋不是保護
近年大家的焦點放在大女身上，有不少惡意批評，問到可曾為此限制囡囡出po，他說︰「我唔係咁睇，保護小朋友點解係收埋唔好俾人見？我同太太都覺得最好嘅保護，係要培養佢成為一個自信心、勇敢堅強嘅人。阿女又冇做錯事，人哋去批評佢個樣、身形、著衫呢啲，但呢個係18歲女佢要顯露『我係咁』，唔需要特別去遮掩，咪俾佢去面對下出面人對佢嘅攻擊。我都有問過佢，佢話『OK，唔睇留言咪得，佢哋又唔影響到我繼續同家人、朋友開心』。佢係好正面同樂觀，而且係令我同太太都覺得佢犀利喎！」
他指大女現在能成熟面對網民的留言，相信她未來可以獨當一面，自己處理難題。他認為做父母不能一味幫子女去解決問題，而是從中幫助，讓他們知道解決問題仍須靠自己，但家人一定是最強的後盾。
Bob的大女的打扮引來外間不少聲音，Bob有關心大女，囡囡表示自己沒有被留言嚇怕。
Bob認為做父母不能一味幫子女去解決問題，而是從中幫助，讓他們知道解決問題仍須靠自己，但家人一定是最強的後盾。
距離成功仍很遠
跟子女的相處，Bob慶幸每次一家人食飯，大家也會一齊討論生活日常，互相給予意見。至於跟太太的相處，他指跟太太過去甚少有爭執，當然也有意見不合的時候，但大家都會各自讓步，而今次talk show有部分內容就會把他跟太太相處的模式搬上舞台，他相信大家會有共鳴。Bob每一個talkshow都是用自身經歷作分享，而且每次演出的城市愈來愈多，問到是否覺得大成功，他說︰「唔可以，都唔知自己行唔行到去成功個位。我唯一感到成功個位係，每年都有啲進步，每年定嘅目標完成到幾樣，就好似做電視劇男主角，我講咗好多年，今年終於有機會做到；talk show今年開嘅地方又比上一次多，我好感恩！」
Bob說︰「我唯一感到成功個位係，每年都有啲進步。」
Bob表示作為男人一定會為家庭、事業去拼博，自己亦希望有日打動到未能接受他的觀眾。(周令知攝)