爾冬陞指不止業內有性騷擾，其他行業也有。
爾冬陞、馮德倫、楊偉倫及香港新銳導演王德健出席《第四幕》慈善首映。有份參與演出的袁澧林未有現身，日前她在網上發文透露入行以來屢次遭遇言語騷擾、無故性化及肢體侵犯的經歷，馮德倫表示有看到她的文章。
馮德倫說：「我相信我哋成個組都支持佢嘅！」問到拍戲有沒有遇到演員遭不禮貌對待，他表示不止娛樂圈，任何行業都會有，相信辦公室有更多。而拍戲因為有making of，很多畫面會記錄下來。
爾冬陞、馮德倫、楊偉倫及香港新銳導演王德健出席《第四幕》慈善首映。
問到拍攝時如見到演員遇上不禮貌對待，會否伸予援手，爾冬陞表示欺凌問題由讀書時代已有，在生活上難以完全消失。「呢啲事件，如果有人受到侵犯，有證人係犯法，咁就好易處理。係（拍攝）現場，未必咁嚴重，但有牽涉到人嘅品格、道德水平係非常之難處理。我做導演嘅現場一定唔會有咁嘅事發生。」
他續指自己見過多是口花花居多，亦見過在一些場合有不禮貌舉動，「喺呢個行業無論男性或者女性都要學識保護自己，我個女都11歲，我都有教佢呢啲嘢。」他表示不禮貌對待甚至乎家暴多女性受害者，但男性也有，「呢個社會議題係好難處理。我覺得我哋身為導演喺現場有責任，我做演員嗰陣好小心，試過有啲戲要撫摸女演員。我哋係要傾咗先！我係非常謹慎，所以開玩笑話拍床戲好辛苦。我試過趴喺一個女仔身上，係要晾起自己，唔好俾自己身體或敏感部位掂到對方，所以拍床戲係好辛苦。我諗任何職場都有呢啲嘢，無論男性或女性都要表達出嚟。」
爾冬陞希望男女都要保護自己。
他坦言在這個行業如遇到類似事件，一定要嘗試表達自己感受，讓對方知道有不妥的地方。他說：「你叫年青嘅人一下反面，係有好多嘢考慮，但你個表情要話俾人聽，可能你初初係笑，但個笑係要話俾人知你會反面，仲有啲嘢再嚟嗰陣，你唔好係咁退縮，咁道德水平低嘅人，咪會一步步踩埋嚟，所以係每個人成長過程要學嘅嘢，唔止係電影圈。」
他坦言做電影會會長時，遇過一名男演員投訴一位導演性騷擾，但對方不是會員，自己難以處理，也試過有人投訴類似事件，自己有去查證，如果只是言語上，也難以「告得入」，但支持所有演員如遇到欺凌事件，一定要出聲，至少導演要知道，如果涉及到導演行為有問題，就要找他或鄭保瑞及監製去處理。