【自信返晒嚟】木村拓哉帶老婆夜蒲

木村拓哉新劇《BG~身邊警護人》播完，平均收視錄得15%以上，叫做飲得杯落，木村開心晒，自信心返晒嚟，真係行步路都醒啲。爆料雜誌《FRIDAY》報道，木村喺日前帶埋老婆工藤靜香去位於惠比壽嘅酒吧參加派對。木村當晚穿上皮褸皮褲入面仲有件牛仔褸，超級有型之餘仲行得好瀟洒。老婆工藤靜香就離老公幾個身位好似唔識咁。報道指，呢間酒吧嘅老闆娘人面廣，識得好多藝能界大人物，所以好多明星都俾面佢。除咗木村夫婦，當晚仲有尊尼組合KAT-TUN成員龜梨和也、TOKIO成員長瀬智也，男星松田龍平與中田英壽都有到場。