韓片玩血腥近年玩到出神入化，表表者大概要講《原罪犯》朴贊郁，出色剪接反轉傳統敘事手法，但擺鏡依然離不開傳統嗰套。拍攝血腥暴力電影，多數用近鏡拍血泊、傷口甚至劏肚、斬首後狂噴血渲染氣氛，而隨著VR技術普及，血腥動作片亦開始模仿VR效果，加入過去較少用嘅第一身主觀鏡拍攝，而最近成為熱話嘅《惡女》，就堪稱近年拍得最好睇嘅韓式「VR系」動作片。
文：Wing
偽VR片 伏片居多
以前之所以少用第一身視點拍法，除咗因為攝影器材難配合之外，同時亦難以完整交代劇情，而且睇到觀眾頭暈，情況就似J. J. Abrams08年嘅《末世凶煞》咁，記實式手搖鏡搖到人眼花繚亂；而近年另一部玩出事嘅作品，就係去年4月上映嘅《爆機特攻》，導演Ilya Naishuller曾以全第一身主觀鏡拍攝短片兼成為佳作，但以同一方法拍電影，似乎唔係幾work，最終因故事誇張失實而令口碑、票房兩失。
同樣用大量第一身主觀鏡拍攝嘅《惡女》，由《飢渴誘罪》「夫妻檔」金玉彬及申河均主演，並由《星級殺人犯》鄭秉吉執導。故事講述主角淑熙自細被栽培成冷血殺手，韓國情報局指揮官威迫利誘，要佢做10年刺殺特務，以換取自由，期間卻遇上暖男賢垂，令佢有機會離開腥風血雨嘅殺手生涯。
第一身主觀鏡 模擬一鏡直落
《惡女》嘅故事，毋疑同昆頓塔倫天奴嘅《標殺令》有點相似，但導演鄭秉吉勝在敢於嘗試，為咗營造「打機」效果，喺開拍前進行多次實驗及修正，成功鋪排連場迫真殺人戲。電影一開場已上演一幕模擬一鏡到底、6分鐘嘅殺人戲，觀眾喺大銀幕見到嘅，係女主角第一身視點，陪佢穿梭走廊、健身房及實驗室。但有趣嘅係，呢類鏡頭難免嚴重搖晃，但連睇6分鐘竟然出奇地冇頭暈，相信係因為攝影導演選擇自行改裝頭盔，用輔助攝錄機拍攝，而唔係用GoPro嚟拍。
康城放映獲得好評
除咗開場頭6分鐘之外，電影中後段各有富新鮮感嘅(扮)一鏡直落兼第一身視點鏡頭，有啲係爆破兼一躍而下，亦有公路追逐加打鬥，拍攝部分場景時，攝影師更同女主角一齊吊鋼線跟拍，每幕動作戲都見盡心思及功架，難得嘅係，動面設計精彩之餘又能配合劇情，認真抵讚。再加上《惡女》早前參展康城「午夜展映單元」獲得好評，放映後全場觀眾更起立拍掌4分鐘，為此片帶嚟相當好嘅口碑，喺南韓上映時，開畫票房贏盡同期西片，絕對有機會成為南韓動作片代表作。
《惡女》
上映日期：即日
ADVERTISEMENT
【開APP領取】免費換領麥當勞叔叔之家利是封及揮春
