2025-10-06 11:30:00

193郭嘉駿送月餅予Lolly Talk遭打回頭被屈因負面新聞縮沙

今日是中秋節，贈送月餅慶賀佳節是傳統。ERROR成員郭嘉駿(193)的自家品牌今年亦有推出月餅，並送給不同藝人作賀禮，其中一個是「最近有新聞的女團」，雖然沒指名道姓，相信是早傳出因金主閂水喉，全員半年來冇糧出，更被通知每人倒欠公司20萬元的女團Lolly Talk。不過，193意想不到是月餅被打回頭，更被對方經理人屈他因女團的負面新聞，臨時縮沙回收賀禮。

被速遞公司退貨

193於Lolly Talk預告月底將齊人現身萬聖節活動前，曾在周三(10月1日)於Threads發文分享一件「黐線」事，他表示，今年自家品牌推出月餅，禮貌地預備一定數量贈予圈中友好，包括Lolly Talk，他寫道：「其中幾盒月餅我哋寄咗去最近有新聞嘅女團公司地址，我亦都通知咗女團成員月餅即將會寄出，但因為送咗兩次貨都冇人收件，咁速遞公司一貫嘅做法就係會退返啲貨畀我哋。」

質疑有人講大話

對於退貨原因，193大感莫名其妙，他續指收到消息，另有故事，「佢哋一位女性經理人同佢旗下嘅成員講，話打咗電話去問，確認咗我哋係因為佢哋嘅負面新聞而收返啲月餅，咁究竟佢係打俾邊個問呢？佢冇問過我，亦都冇問過我同事，唔通係速遞員答佢？？？咁我係唔係應該投訴間速遞公司？我依家真係摸不着頭腦，呢個世界真係有咁多黐線嘅人，定係有人習慣性講大話，抑或係呢個世界真係好多誤會呢？想大家幫我研究吓，究竟係嗰位女經理人講大話，定係速遞員講大話。」不過，事後不知何故，193已刪除發文。