現年46歲嘅1996年香港小姐季軍袁彩雲，無論出身同學歷可以講係十分優秀。當年佢參選時，憑住出生於德國，識得多國語言，成為當年港姐熱門人選之一，可惜最終由另一大熱門李珊珊奪得冠軍，而袁彩雲則奪得季軍。
其後袁彩雲加入TVB，並隨即被安排加入處境劇《真情》及多部劇集拍攝，包括經典劇《封神榜》，袁彩雲飾演妲己妹妹蘇凝香，雖然佢唔夠溫碧霞咁嫵媚多姿，不過佢亦有獨特魅力。多年來佢有唔少演出機會，可惜星運平平。
而感情方面，佢亦並非一帆風順，佢曾經同全國政協胡應湘之子胡文新拍拖，外界睇好佢同徐子淇一樣嫁入豪門，可惜呢段感情只維持半年就分手。之後袁彩雲去溫哥華登台時邂逅餐廳老闆江銘峰，二人正式拍拖，幾年後喺溫哥華秘密註冊結婚，喺香港舉行結婚禮後移居溫哥華，並淡出香港演藝圈，專心相夫教子，一家三口生活美滿。後來又有傳佢老公餐廳經營不善致累積欠下租金，不過袁彩雲對欠債傳聞無做任何回應，反而經常係個人社交平台上傳一家三口生活照片，亦見到佢美貌依舊，唔少網民都讚佢靚同保養得宜。
