柳應廷演唱會｜Jer孖RubberBand合唱《逆流之歌》為艱難期打氣(有片+多相+歌單)

MIRROR成員柳應廷(Jer)於亞博舉行《Jer Lau “The Shape of Breathing” Live 2025》，昨晚(1日)舉行尾場，鑬於大埔宏福苑奪命大火，造成嚴重傷亡，演唱會如頭場一樣，首先由Jer帶領默哀及唱出衛蘭的《呼吸之間》，結束哀悼和安慰儀式後才返到後台整裝，同時讓觀眾沉澱情緒才正式開場。隊友邱士縉(Stanley)和女友李炘頤(Alin)、毛舜筠、許廷鏗、陳健安和彭秀慧均有捧場。

柳應廷Jer演唱會獲RubberBand擔任嘉賓，合唱《發現號》和《逆流之歌》。(吳康琦攝)

無論幾辛苦都有我唱歌撐住大家

默哀後，柳應廷預告：「我將會帶大家進入一個旅程，阿Jer喺呢七年做嘅狂想世界，去到將自己粉碎，再將自己一啲碎片修補。」Jer接連唱了20首歌後，才開腔說話，當與小朋友合唱《Dear Children》時，Jer分享創作此曲的原意，「見到有社會上有好多小朋友受到壓力，有很多不幸嘅事情，所以我當時創作呢首歌，好想話俾大家知，就算幾辛苦，起碼有我呢個唱歌嘅撐住大家，其實我成日幻想唱呢首歌大合唱嘅畫面，因為大合唱嘅力量，令自己知道同行嘅唔係得自己一個嘅孤單，仲有一大班人一齊唱歌嘅人。」他笑言要謝合唱的小朋友，以及全場觀眾。

緊守崗位以音樂陪伴

兩場演唱會均請來樂隊擔任嘉賓，繼頭場的Pandora後，昨晚有為Jer演唱會創作主題曲《今繼》的RubberBand登場，合唱《發現號》後，RB主音6號表示，「其實喺做呢首歌嘅過程，都係療愈一啲傷痛。喺呢個時候好需要歌曲的力量。」Jer自言從小聽RubberBand的歌曲長大，一直以來都為樂迷帶來正能量，6號自言是微小的音樂單位，「喺呢個相對艱難嘅時候，希望可繼續謹守自己崗位，用音樂陪大家走每一段路。」接著再送上《逆流之歌》，其間Jer一度蝦碌地入錯拍子，尷尬得像害羞的小孩攬著6號。他在完騷受訪時直言太興奮至入錯拍子，「佢哋啲歌好有能量，見到現場觀眾(反應)，成個場都warm晒。」

邀吳林峰合唱演唱會最後一曲

Jer於尾場兩度encore，第二次encore時送上Moon Tang的《未來之歌》，繼而邀請為演唱會唱和音的戰友吳林峰上前合唱《豆豉》，兩兄弟深情對話。阿Jer形容兩人際遇相似，想一起為今次演唱會送上最後一首歌，「我哋都係由busker到舞台，由相識到出道之後，佢幫我寫好多歌，所以喺演唱會最後一刻，好想同佢分享呢個舞台，我哋兩個都好純粹，好鍾意唱歌，如果冇咗音樂未必知自己會點。佢寫歌數量超級多，亦都好好聽。」

Jer被爆緊張到唔識笑

吳林峰感觸回應：「作為朋友，可以見證你呢幾年行到唔同嘅路好開心；作為寫歌嘅人，啲歌交到你手上係好放心；作為兄弟，喺你兩場好重要嘅個人solo可以撐住你，覺得係好窩心。」Jer亦回應道，「佢係唱作歌手，喺後面幫我做和音彈結他，仲要每次開騷前都會同我講：『Jer，唔使緊張！』雖然我冇緊張，每次見到佢都好輕鬆。」吳林峰爆料道：「知唔知我叫佢唔好咁緊張，佢都話見我係第一次笑！」兩人溫馨合唱《豆豉》後，拍拍彼此肩膊並互擁。Jer受訪時表示，一直很喜歡《豆豉》，很想跟原唱的吳林峰同台合作，對這首歌的歌詞很有感覺。也許，歌詞寫道：「唯有把這些音符拼出音樂/為時代填充/孤單中聲援/現有愛恨」，正好為艱難時期的兩場演唱會，畫上圓滿句號。

觀眾轉化情緒帶笑離場

談到為大埔火災調整演唱會內容，Jer表示，「無論睇新聞或經歷當中嘅朋友，好想幫佢哋搵到一個空間去，俾自己唞一啖大氣，繼續手牽手行下去，rundown以入場觀眾同心情為主，所以有默念，同埋揀咗首歌，配合主題，俾大家放鬆心情。」其中主要改動是開場唱《約齊靈魂在墳墓開生日派對》改為純舞蹈不演唱，「係團隊一齊嘅諗法，我哋用做好多心機去排呢隻歌，想將排練咗嘅呈現出嚟，最後決定唔唱但繼續表演。」他直言火災事件影響心情，但看到演唱會能為觀眾大家，也感安心，「我原意就係想幫大家叉電。最感動係見到觀眾情緒轉變，由入場大家好凝重，到最後帶著笑容離開。」對於有不少觀眾睇到喊，Jer坦言也看到落淚的臉孔，「我覺得喊都係抒發情緒位，如果想喊就盡情咁喊。」問到他在台上可有強忍淚水，他自言已大個仔，懂得在表演時控制情緒，交出專業水準。

另外演唱會其中一段間場，播了半首男女合唱歌，問到是新作或是特別錄製，阿Jer就按花姐指示拒絕劇透，「係秘密，有樣嘢準備中，嗰隻會喺嗰樣嘢度，我諗好快大家會知。」對於MIRROR取消MAMA演出，阿Jer雖感可惜，但凡事要向前看，並透露正商討將表演搬到元旦騷演出。