Ad Block Ad Block
娛樂
2023-03-09 16:17:00

76歲劉江自爆離巢無綫原因係欠缺好對手:帶住一班小朋友做戲

分享:

76歲劉江效力無綫38年,至2020年離巢;日前劉江與呂珊接受楊紹鴻主持嘅港台節目《一起走過的歲月》訪問重提與無綫結束賓主關係原因,除咗薪酬被減,劉江坦言喺無綫遇唔到好對手:「係!冇錯,真嘅…唉,如果要講呢…會得罪好多人,唔好講喇!大家都喺呢度搵食㗎嘛,好戲嗰啲未必擺埋一齊,所以我撞親都係嗰啲…吓?哈哈哈,即係我帶住一班小朋友去做戲,OK?就係咁簡單。」 笑言其實其他演員好有禮貌咁聽佢講,但就冇乜改進。

無綫劇本一般 團隊無激情

劉江亦坦言不滿無綫「飛紙仔」風氣,指曾經有次拍外景收到一張之前已講過嘅對白紙仔,監製卻對佢表示:「你唔好搵個放大鏡去睇至得㗎,呢張紙仔係某某飛畀你,係有名編劇,你仲想點樣?」劉江又大爆曾經有一次演失明和尚,劇本內經文唔啱,要唸心經,當時修哥(胡楓)就話搵人寫大字報,劉江就指:「我話我盲㗎喎,合埋眼,我點望呀?」劉江仲透露電視台嘅劇本好一般:「我哋拍時每日都要諗點樣可以做好嗰場戲,其實係好難,我盡咗力出嚟都只係ok啦!我唔係咁,我係想部戲好睇,觀眾叫好繼續追落去。呢啲激情係冇…開工就感覺到意興闌珊。」 劉江更指由佳視到麗的再到無綫,自己一直都想打冧無綫,不過楊紹鴻笑言反而係劉江冧先,劉江則指:「做咁鬼耐,佢真係好硬淨,最後我自己走!」

不滿頒獎禮潛規則

除咗以上種種,有指劉江當年對無綫頒獎禮潛規則感到不滿,《萬千星輝頒獎典禮2019》中劉江《金宵大廈》林若思一角本是「最佳男配角」大熱,但最後輸畀周嘉洛,接受訪問時就話嘥氣,喺到10幾年已經知道咩事。不過,劉江仲有一份戲癮,表示若有好劇本將會重出江湖。

原文刊登於 Yahoo 娛樂圈

Ad Block
請接受以下私隱政策及免責聲明,以示你同意am730內之私隱政策及免責聲明。了解更多
接受