Oscar講笑自稱用錯驗孕棒做檢測，AK竟信以為真。
商台DJ兼填詞人Oscar向來與MIRROR副隊長Anson Kong(AK, 江𤒹生)老友鬼鬼，他早前接受本報專訪時指，AK是世上其中一位最善良和單純的人。不過，昨日(14日)Oscar竟公開質疑老友AK有腦霧兼大白痴，而AK亦承認對Oscar有誤解！
Oscar講笑：用錯驗孕棒做檢測
事緣商台DJ麻利昨午在IG分享一件趣事，她跟Oscar近日用Zoom開會，期間齊齊隔空撩鼻做快速檢測並拍照分享結果，而Oscar的檢測板款式跟驗孕棒有點相似，兩人跟AK以WhatsApp討論結果，麻利公開了3人對話的截圖，AK問：「即係無事？」麻利回覆：「佢有咗BB，用錯驗孕棒(檢測)。」Oscar亦傳了一個可憐的emoji作回應並留言：「隊咗入鼻…」
AK信以為真周圍唱
麻利寫道：「AK消失咗幾小時，佢應該都開緊會，但同時我都有諗過，吖，佢會唔會好熱烈咁周圍同人講：『Oscar用錯驗孕棒做檢測』呢件事呢？幾小時後佢(AK)出現返……然後……由晚上11點幾同凌晨1點幾之間，佢(AK)真係同會議中所有人講咗：『喂！Oscar用錯驗孕棒做檢測』！令人重新評估Oscar嘅智商！！實在太瘋狂了！」
Oscar質疑AK有腦霧
從對話截圖所見，無辜被誤會的Oscar申訴：「所以而家人都以為我用驗孕棒嚟驗Covid？！吓！張日寬(AK在廣播劇中的角色名稱)你即刻同我澄清番。」AK再留言：「我會同佢哋講返，呢件事好痴線！」Oscar則寫道：「係人都知係講笑啦！！」接著麻利留言：「令全世界都以為Oscar係一個巨大嘅白痴。」Oscar則回覆：「而巨大嘅白痴其實另有其人。你(AK)快啲去檢測，我驚你有腦霧。」
AK自認有誤解
事件公開後，3人繼續在IG留言，Oscar表示：「我宜家直頭懷疑麻利話我有咗BB嗰一刻，你(AK)已經信咗男性可以懷孕。」麻利則回應：「但係我要講句公道說話，男人如果用驗孕棒，有機會會驗到自己有前列腺或者罩丸問題，我係咪好有學問？」AK則搞笑地回覆：「我對你(Oscar)好大誤解。」最後，麻利更抵死地上載了一張AK啜住棒棒糖的照片寫道：「最後送上佢拎住支非撩棒棒嘅照片，究竟平時AK點睇Oscar嘅呢？會深信佢做出呢啲事？」全程對話非常爆笑！
