Anson Lo將於12月迎來人生第二次個人演唱會。(蘇文傑攝)
MIRROR成員盧瀚霆(Anson Lo)迎來第二次個人演唱會，將於12月6至9日於亞博Arena舉行一連四場《ANSON LO "KINGDOM" LIVE 2025》，以古埃及元素包裝「KINGDOM」主題，打造教主專屬的跳唱國度。回顧兩年間的進步，Anson Lo自言最明顯是情感表達，「長大了，經歷過高高低低，不開心、失望或痛苦都有，感情要自己慢慢發掘出來。」
拒回應性感尺度
Anson Lo自言從小就被埃及文化、建築物吸引，於今年初已想以埃及作主題，充滿神秘感的金字塔屹立不倒，寄意Anson Lo走跳唱路的堅定信念，他更特地朗讀演唱會口號，「No one knows where it came from, but the one thing I'm sure is there for the next 100 years. 這是一個宏願。冇人知埃及金字塔怎樣來，但它永遠存在到下一個一百年，寓意就算Anson Lo點都好，幾多年都會繼續喺度，做好跳唱這條路，希望啦。」Anson Lo形容兩年前的《The Stage》，展現他舞台上的不同面向，兩年後的《Kingdom》將會更大膽進取。問到可會挑戰性感極限？他笑言學精了，「我以後都唔會答程度去到邊，唔想俾神徒有誤錯期望，一如以往，唔會包到實，一定會露少少，係時尚摩登混合埃及style。」上次個唱Anson Lo彈琴為神徒帶來驁喜，今問到次可會練習新樂器時，他就大賣關子，又笑言要獻技吹牧童笛。
享受街跑練氣
Anson Lo形容今次是百分百屬於自己的演唱會，歌單都是個人solo作品，並預告選唱早期作品如《一所懸命》和《EGO》等作品，當然還有一首未推出的演唱會主題曲，「大概11月尾會推出今年最後一首歌，純粹是一首clubbing、開派對歌曲。」他有信心即使第一聽，定必聞歌隨節拍起舞，「今次比《The Stage》跳得多、辛苦很多，因為三分二歌曲以跳唱為主，主打高能量的表演方式。」為了更輕鬆應付高能量跳唱，Anson Lo自今年初已開始跑步練氣，每星期至少練跑3次，即使深夜收工都會堅持，每次起碼6公里，他澄清，「以往都在跑步機跑，但實在太悶，我覺得跑街好似有個進程，自己會開心一點。」
引以為傲的進步
相隔兩年再開個唱，作為歌手唱歌技巧當然重要，但恰當的情感表達亦不容忽視，不一定要說甚麼大道理，但至少要唱出歌曲的故事，「呢兩年除咗技巧有少少進步，無論慢歌或快歌，我覺得多咗唔同嘅聲音演繹，情感表達豐富咗，係我幾proud of嘅進步。」他自爆初出道為《神隊友》錄音時，曾經被花姐狠批，「那時初出道錄音好開心，但錄咗六、七次，花姐話我唱歌真係冇感情，你咬字很好，但逐個字唱出來，可否唱得唱得有感情啲？但我已盡力，但不懂就是不懂。我爸以前常話我太年輕唔會明白，原來沒經歷過真係唔明白。」晃眼出道7年，隨著閱歷漸豐，Anson Lo漸有領會，「其實生活或是工作上，讓我感受不同情感，情感豐富了，長大了，經歷過高高低低，不開心、失望或痛苦都有，感情要自己慢慢發掘出來。」
學習讓自己放鬆
談到進步，不能不提是心境狀況，不時在社交平台分享練跑和行山和grounding(吸地氣)的照片，Anson Lo今年中經過重大手術康復後，看來身心更健康。他坦言，「其實沒實質甚麼事引發，2024年講過要注重work life balance，將生活節奏放慢，盡量令自己冇咁緊張。以前唔會搵方法令自己放鬆，我唔會去行街，但試了幾次grounding、上山，唔係好辛苦嘅hiking，純粹去多樹木和植物嘅地方，hea都可以係紓緩嘅方法。」既然找到一份內心平靜，就持之以恆，外界亦漸發現他表現較從容自在了。
《Lemonade》的困擾
以往Anson Lo面對壓力或自覺工作表現不理想，往往困擾一個月以上，「以前面對好多comment，例如神徒的反應，覺得我做得唔好，都會耿耿於懷。現在可能幾天就能消化，跟自己說move on，記住今次錯誤，下次做好啲。」以最近曾令他困擾是新歌《Lemonade》MV造型，引起神徒或非神徒爭論，意見兩極，「見到大家因為我著嘅衫爭論，我覺得好唔值得，係咪應該揀啲較安全嘅選擇，做人可以好安全，唔使咁色彩繽紛，咁多texture？」他自言不是我行我素的人，今次沒有困在負面情緒，而是探索取得平衡的方案，「如果大家鍾意同唔鍾意嘅比率係50%，就問問自己點解唔可以將比率變成90%人鍾意？10%唔鍾意，即係仲有好多位可以進步，下次揀衫要注意多啲，仲可以做好啲。」
盼攜手與世界接軌
今年Anson Lo曾參與新加坡WATERBOMB、澳門TMA頒獎禮、與隊友姜濤、呂爵安(Edan)和李駿傑(Jeremy)往泰國表演，又帶《全民造星VI》師弟往韓國表演，積極拉闊觀眾層。不過他坦言：「其實好難，但都會針對這方面去定下年計劃。先唔講其他地區，香港仲有好多人對Anson Lo冇興趣，或約粹認識，冇特別睇佢嘅作品或聽佢嘅歌。其實我唔覺得自己有能力擴闊大家的眼光，我只係香港一個小小歌手，只能推出多啲不同嘅歌，跟觀眾一齊同呢個世界接軌。」
文：Grace 攝：蘇文傑
化妝：Rainbow Chung @ Annie G. Chan Makeup Centre
髮型：Denny Ku @ CHIC Private I Salon
服裝：Harrison Wong, BOTH
造型：PIPA Creative
場地：Lubuds Group, FWD House 1881
Anson Lo盧瀚霆將於12月舉行演唱會，接受am730訪問為個唱宣傳。
