愈嚟愈接近奧斯卡頒獎禮，全球影評、電影雜誌例牌出預測文(Predictions)，一場年度牙骹戰，如箭在弦。喺最佳電影及技術獎項上，氣勢最強仍然係大破金球獎紀錄嘅《星聲夢裡人》，而競逐「最佳女主角」嘅愛瑪史東亦呼聲甚高，之不過，「最佳男主角」一獎似乎就冇咁順利，事關今年跑出一個估佢唔到咁好戲嘅《情繫海邊之城》(Manchester by the Sea)加西艾佛力(Casey Affleck)，佢早已不動聲色，橫掃接近50個「最佳男主角」獎。
文：Wing
《情》片舊年11月喺美國限量上映時，擺明被睇低一線，原因離不開製作及演員班底唔係頒獎禮常客。主演嘅加西艾佛力叫做有啲名氣(源於佢阿哥係班艾佛力)，但甚少擔任主角，即使有份參演得獎片《驕陽似我》及大製作如《盜海豪情》系列等，都俾人暗啞底笑佢靠阿哥帶挈。
麥迪文轉贈劇本
另一個令呢部戲被睇小嘅原因，就係導演堅尼夫羅納根。呢位甚有才華、編劇出身嘅美國電影人，曾經寫出馬田史高西斯《紐約風雲》如此出色嘅劇本，但導演作品至今只有3部，包括《請再靠近我》、《Margaret》以及今次一戰成名嘅《情》片。堅尼夫羅納根多次感謝監製麥迪文，全因迪文BB有情有義。劇本原著故事，其實來自森文迪斯小品之作《尋找快樂窩》男主角John Krasinski，麥迪文聽咗佢嘅故事後，一度計劃自導自演拍成電影，但因為撞期而放棄，同時，佢戥合作過嘅導演堅尼夫未被賞識唔抵，於是將故仔轉贈俾佢。
贏在歇斯底里
此片英文名為《Manchester by the Sea》，當中嘅Manchester唔係指曼聯嗰個曼徹斯特，而係美國波士頓附近小鎮「Manchester by the Sea」。故事講述主角Lee因兄長離世，被迫擔任姪兒監護人，兩人關係由疏離變得親密嘅過程，一步步揭開主角背後故事。電影初段呈現主角超級歇斯底里、暴躁，呢個心理狀態設定，成為加西橫掃男主角獎最大契機，亦係佢全片演得最好、最有驚喜嘅部分。
單挑丹素華盛頓
今屆奧斯卡「最佳男主角」，毋疑係加西呢世仔最重要一戰，雖然有個金球獎戲劇類最佳男主角打底，但今年Oscar「染黑」趨勢甚強，《Fences》丹素華盛頓隨時繼美國演員工會獎後再度稱帝，成為史上首位兩奪Oscar影帝嘅黑人演員；而次熱門《星聲夢裡人》賴恩高斯寧，似乎俾部戲同導演戴米恩查素搶晒鏡，稱帝走勢現正下滑；而《鋼鋸嶺》安德魯嘉菲今屆未成氣候，受制於老米(米路吉遜)作品太導演向，未見個人特色；最後一位係《神奇虎爸》維高摩天臣，唉，有演技，有好配角，有好劇本，衰在電影太異類及小品，Oscar嘅嘢……唉，不要再說了。
《情繫海邊之城》上映日期：本月23日
麥迪文同導演堅尼夫喺《Margaret》首次合作後成為好友。
麥迪文同班艾佛力有幾老友，唔使多講，而佢又曾經同佢細佬加西合作，提拔下理所當然。中間嗰個係Oscar候選最佳女配角米雪威廉絲。
加西同阿哥班艾佛力N年前嘅合照。