李思捷、黃智賢、麥長青、曹永廉、唐文龍組成的Hey Brother，往西貢為新歌拍MV。
由李思捷、黃智賢、麥長青、曹永廉、唐文龍組成的男子組合Hey Brother，繼年初成團首推歌曲《我為人人》後，最近再推出新歌《共唱輝煌》，為了捕捉旭日初升的畫面，五子更於日出時份走到西貢拍MV，熱到汗流浹背，更慘被蚊狂叮，麥長青感嘆許久沒試過「03」通告， MV場地亦滿載多年前拍TVB古裝劇的回憶：「呢度係以前拍古裝劇成日嚟，以前啲路都未整好，我哋要著古裝行半個鐘，夏天真係一身汗，唔知道後生時點解咁捱得，而家要我行，真係頂唔順。不過好開心，可以幾兄弟一齊咁早起身拍攝，大家都冇帶櫈，企足一朝早，曬到皮膚變黑！」
黃智賢發揮獨特性
新歌提到尋找初心，5人均指Hey Brother的組成為他們尋回不少入行初心，其中黃智賢感觸地說：「入行由青少年大使開始，然後拍兒童節目，嗰段時間除咗參與幕前演出，亦會代表公司參加社區活動。雖然只係新人，但感覺到自己做一啲有意義工作，就如同一粒小螺絲發揮獨特價值。但隨住時代變遷漸漸淡忘咗初心，直到最近Hey Brother成立，大家不謀而合要出歌發放正能量，重新感受當年做一粒小螺絲嘅價值。」曹永廉則憶述他初入行最鍾意唱歌：「最早期喜愛唱歌，之後轉型拍劇，而家又重回唱歌懷抱，已經搵番初心，希望憑歌曲帶畀大家共鳴。」
李思捷恨一齊拍戲
至於唐文龍透露今次MV拍攝經歷天氣變化，喻意黑暗過去會迎來美好將來：「上次MV喺室內拍攝，相比之下今次拍攝時間較早，啱啱出發落緊雨，但抵達現場後雲霧散去，天朗氣清，就似意味遇到困境毋須意志消沉，柳暗花明又一村，畀大家鼓勵。」
Hey Brother現已籌備第三首歌，李思捷透露歌曲會很rock，以男人之苦為主題，連自己也估不到五位叔叔竟有新突破，想必會為觀眾帶來新鮮感，除了推出歌曲，李思捷直言：「我哋五個想一齊拍戲，因為大家喺演戲上都有豐富經驗，相信出嚟效果會更成熟。相比年輕時，我哋而家人生經驗多咗，希望透過作品令觀眾笑一笑，分享快樂給大家。」