無綫J2台節目《不正常愛情研究所》由一班J2ers黃紫恩（Jojo）、吳兆麟（Alan）、敏芝（Karen）及兩位客席嘉賓麥惠琪（Susuca）、文頌男（Koba）主持，互相交流獨特愛情觀與拍拖經驗，而嚟緊星期四（15日）播出一集將會以「捉姦攻略」作研究題目，Koba更大爆有知名男歌手做第三者一事，相信內容會係開播以來最爆嘅一集。
Koba透露故事主角係佢一名男性友人，雖然佢被派綠帽，但竟然因為第三者係知名男歌手而唔覺得羞恥，相反更以女朋友與明星出軌為榮。Koba分享，該男性友人對女朋友成日聲稱到酒吧消遣感到奇怪，於是檢查對方手機嘅安心出行App：「搵到去酒店記錄。等到女朋友再話去酒吧，朋友就去嗰間酒店樓下等。」最後，男性友人見到女朋友好親密咁繑住一名男仕；不過佢無覺得嬲，而係覺得好威，Koba解釋︰「因為個姦夫係好出名嘅男歌手。」其他主持隨即起哄並要求Koba畀貼士，從有關該歌手嘅特點，Jojo同Karen秒猜出男歌手身份。想知道該男歌手係邊個？咁就要留意節目啦！
原文刊登於 Yahoo娛樂LOL，am730獲授權轉載
