影后毛舜筠先後跟MIRROR成員柳應廷(Jer)和呂爵安(Edan)合作拍電影，分別在《阿媽有咗第二個》和《過時過節》演Jer和Edan的母親，作為「鏡仔御用媽咪」的毛姐，早前便邀請兩個仔到她家中食飯，順便教兩人炮製特色沙律。Jerdan合體跟毛姐學廚，邊傾偈邊偷食邊整沙律，從飲食喜好談到擇偶條件，過程笑料百出。
geoduck係地理鴨？
首先，Edan看英文menu時，照字面將black geoduck譯為「黑嘅地理鴨」，嚇得毛姐立即糾正：唔係地理鴨呀，係象拔蚌呀！」Jer自問無知睇唔明，「我哋唔好睇喇好唔好呀…」好奇的Edan繼續邊看邊問，其實毛姐早知兩人個仔少入廚房，為免雞手鴨腳搞亂檔，教他們製作最簡單的「本地油蝦鮮果沙律」，兩人全程互mean又不斷偷食，搞到毛姐哭笑不得。
從烹飪說到擇偶
其間，毛姐跟兩個仔傾談擇偶條件、試鏡過程等趣事，Edan一句阿媽、Jer一句媽咪，搞笑又溫暖。毛姐率先問兩人揀老婆是否要懂煮食，還大爆，「佢係好鬼專一又好多情㗎！」Edan強調，「啊，多情嘅！」Jer即時澄清：「專一！」毛姐解釋說：「多情係指一愛就好愛。」談到擇偶條件，Jer表示煮食不是最重要考慮，不懂煮可以一齊學習，最重要是性格和有共同話題，「我自己好追求嗰種共同嘅嘢，例如我好鍾意食蝦…er…離咗題…因為我自己鍾意art多啲嘅，如果對方藝術觸覺同我好似就會好啲。」Edan即回應，「所以我同佢都係唔夾，你試下同我講art？」此話一出，差點令毛姐誤會他真的討厭藝術。
Jer打完又挨膊頭
Jer切芒果時，毛姐問Edan如果他愛吃芒果，但女友不愛，那怎辦，爵安說：「唔緊要，我食。」他認為每個人都不同，「冇人可以同你完全夾嘅，最緊要尊重大家，你唔需要迫大家跟你嗰套，唔會好似Jer咁，你唔鍾意食蝦，佢迫你鍾意食蝦……」Jer聞言即放低把刀，拍了Edan心口一吓，「你唔好亂咁講我迫人哋點呀！」毛姐見狀急忙說：「唔好打交。」Jer續說：「我冇迫到，你唔好屈我…」然後纣頭挨在Edan的肩膊上，有種互mean就是叫Jerdan。
愛上演戲
毛姐又與Jer談到拍攝《阿媽有咗第二個》的感受，Jer自言拍劇經驗不多，起初只抱著有機會就嘗試的心態，去試鏡演姜濤的角色，向來感性的他初看劇本已感動落淚，後來得知被選上也感開心。毛姐問他後來轉為演她兒子有何感受，Jer直言曾感擔心，因為角色情緒起伏很大，而且還要學習喜劇節奏，幸好漸漸也開始掌握多一點。忙著吃芒果的Edan不忘指出：「你的感性可幫助演戲，唔好浪費。」毛姐點頭：「Jer真是很感性。」Jer解釋初出道不太想拍戲，因為當時只想發展唱歌，「第一年未有機會出solo歌，我又入咗跳舞男團，要做一啲唔擅長嘅嘢，覺得好迷惘，唔想再做一啲自己覺得唔係最主要的路線。」他表示經過這次演戲經驗，愛上演戲。作為新人，他又自言很幸福，遇上肯悉心教導又可訴心事的前輩和導演。
