MIRROR12子早前接受訪問，分享《MIRROR Time》鏡頭背後的花生趣事。(李睿哲攝)
MIRROR成軍5年，終於成功爭取全團出埠拍團綜，早前齊齊飛往澳洲拍攝的團綜《MIRROR Time》，將於明天(8日)倒數播出最後6集，除了鏡頭前看他們為100澳元混戰、爆笑玩Pillow Fight、分組比試廚藝等，相信鏡粉也樂於聽他們分享鏡頭背後的花生趣事。12子早前接受本報訪問，互mean爆料，總之12鏡聚在一起，就奇妙事不斷有。
姜濤po黑圖 影響公司股價
今次《MIRROR Time》雖不至於素顏出鏡，但大部分都只是淡妝示人，那豈不是大量黑圖？Stanley與Edan互有要脅對方的黑圖在手，不過最厲害一張是姜濤，出自「大表姜」坐小型飛機的環節，Stanley曾在《爆谷一周》透露姜濤幾乎全程伏低頭，他從低角度拍了一張姜濤暈浪作嘔的黑圖。他自首，「嗰張好勁，po咗出嚟，唔單止佢玩完，我都會玩完。」豈料姜濤堅持，「我生日會po呀！」旁邊的Tiger忍不住爆一句，「會影響ViuTV喎！」眾兄弟齊聲勸阻，「股價跌呀！」姜解釋，「人生經歷最痛苦的一刻，Stanley喺隔籬笑得好開心，我幾乎要嘔。」到底這張獲眾鏡仔認證的姜濤終極黑圖有幾勁，就要等明年4月姜濤誕揭曉。
繼《調教你MIRROR》12子再次同居共處一星期，問到今次誰是喊包時，他們指會有眼濕濕，但就不會爆喊。當Stanley當被問到可有在傾心事環節分享「雪精」的進度，他尷尬指大家也有摸酒杯底傾男人心事，並扯開話題大爆Jeremy(李駿傑)堅持滴酒不沾，而Tiger則沒有飲醉酒。
Anson Lo餓到要食剩飯
至於Anson Lo(盧瀚霆)雖然通宵拍完MV，略顯疲倦，在好兄弟Edan和Jer努力讓他喚回記憶下，記起通宵狂掃杯麵的情景，Stanley大爆，「佢好鍾意凌晨12點幾一點食飯，有次我哋打牌，佢無端端敷住mask，拎住個飯盒。」Anson Lo解釋，「因為好肚餓，佢哋8點幾食剩crew飯，丟在門口的垃圾桶隔籬……(AK驚訝：仲攞嚟食？)，無嘢食嘛！」Stanley續說：「我哋叫佢叮熱食，但佢又嫌麻煩。」Edan抵死加多句，「佢唔鍾意整杯麵，但鍾意食杯麵。」然後兩人你一言我一語，「佢唔鍾意煲水」、「但最後都有杯麵食」、「個杯麵掀起蓋就有熱水」，場面一度失控，AK笑著總結，「不如我煮埋俾你？咁又好喎！」Anson Lo沒好氣表示，「你煮埋俾我，當然要說多謝，但我不會強迫大家。」相信鏡粉看完上周五(5日)一隻，12子分組分試廚藝，看Anson Lo炒西蘭花雞柳加蛋、防腐劑年糕等蝦碌事，大概也明白為何他不想淥杯麵。
文：Grace 攝：李睿哲
化妝：Annie G. Chan, Rainbow Chung, Giann Cheung, Yumi Cheung @Annie G. Chan Makeup Centre
髮型：Man Chan, Lydia Yung, Denny ku@CHIC Private I salon
Seiko Sin, Manho Li, Frankie Ho,Will Choi@HairCulture
服裝：Burberry, Emporio Armani, Mr. Porter, Ports V, Halfboy, Farfetch, D-mop, Giuseppe Zanotti, Christian Louboutin, A Better Mistake
Stylist : PIPA Creative