寰亞樂隊Nowhere Boys （NWB）成軍十周年，於尖沙咀開設「給十周年的概念店」
寰亞樂隊Nowhere Boys （NWB）成軍十周年，於尖沙咀開設「給十周年的概念店」，上周六（23日）邀請好朋友陳健安（安仔）擔任「Nowhere Boys mini live gig」嘉賓，更巧妙地將樂隊名最開頭兩個字母調位，變成加入安仔後的一日限定樂隊「ONwhere Boys」。
音樂會吸引過百Fans報名入場欣賞，非常熱鬧。NWB以《大不了的一代》打頭陣，然後演唱《地球候機室》和《票房毒藥》。更受BIG FOUR早前紅館演唱會「四手合奏一支結他」的表演啟發，5子合奏一支低音結他表演。主音Van笑言破壞了原曲的氣氛，琴鍵手漁佬揚言太刺激，出了一身汗要除外套散熱。
Nowhere Boys加入陳健安組一日限定樂隊
安仔出場，與NWB表演他今年第一首派台歌《不遲不早》和NWB新歌《給受困者的一封信》。安仔說：「呢兩首歌背後意思好接近，都係叫大家畀啲時間，畀啲耐性。」而唱《我們的移動城堡》時Van說：「呢首歌安仔曾經喺『拉闊音樂會』solo，我覺得安仔係除咗我之外，最適合唱呢首歌嘅人。」安仔說：「可能都係由Oscar填詞，好夾我嘅風格，今日同原班人馬合作，互相發放嘅能量好勁，好有同行嘅感覺。」
安仔並分享與Van初相識時，有一次參加毅行者籌款活動，Van帶埋女友，即現在的太太Wendy攀山涉水去打氣，令他感動。音樂會尾聲安仔有驚喜彩蛋，他說：「我今日帶咗我親手夾嘅公仔嚟舉行『愛心領養』，大家捐錢抽號碼領養一隻公仔，所有捐款全數捐出。」他更為善長和公仔加持，跳舞、唱歌、拍照、送祝福，Fans滿載而歸。據悉安仔這次將捐款幫助流浪貓狗。
同場Van穿上新鮮出爐NWB十周年紀念tee，他說：「呢件tee由我太太設計，除咗印有10周年和NWB 嘅logo，仲印咗Nate （鼓手）手寫畀fans嘅英文信。開頭寫住Dear，將來為fans簽名時可寫上對方名字作為上款，小小心思。」Van並宣布好消息：「NWB等咗好多年終於衝出香港啦！9月我哋會去新加坡參與『JAM OFF 2025』音樂節 ，勁啦，我哋係同鄭伊健一齊架，Oh My God！」他是伊健的忠粉，提起即笑到見牙唔見眼。被指是追星天花板的Van說：「咁鍾意一個偶像，由細聽佢嘅歌、睇佢嘅戲長大，大個咗有機會同偶像一齊出trip，夜晚我哋會唔會喺酒店⋯⋯（安仔：食胡椒蟹、肉骨茶）唔好太多幻想，係音樂交流呀！」他表示會悉心選歌，讓更多人認識NWB。
立即更新/下載AM730手機APP 體驗升級功能
