RubberBand與側田將於12月首度合體舉行《Just Rub It》 Live。
RubberBand剛完成英國站的《A Night In》巡唱並於11月舉行台灣站，不少香港樂迷都關注他們何時在港開Show，原來RB四子早有準備，他們將與出道20周年的側田合體開Show，定於12月13日在西九文化區竹翠公司舉行音樂會《Just Rub It》 Live。門票於10月13日優先發售，10月15日正式公售。
入世未深 自己顧自己
RubberBand、側田同期出道，屬同一公司，可謂識於微時，RB主音6號對今次合體甚表期待：「好似重回入行的時候，有興奮嘅心情！因為有兩個單位嘅火花，同自己做騷好大分別。十年前我們同公司，有不少機會同台演出，當時我們『入世未深』只顧自己部份，希望今次將側田融入成為一隊大編制的樂隊，大家可以隨時『轉位』表演，呢個就是好玩之處。」
他形容側田是「音樂狂人」，欣賞他對音樂的堅持：「他的唱歌技巧、感情是很高階，他的流行Hit歌是當時的回憶，轉眼就20年，『回憶殺 』相信今次個唱其中一部份。我最想唱他的《Erica》一曲，20年前第一次以RubberBand身份，改篇呢首歌與側田合唱，所以好想圓夢再唱多次。」
側田返香港練歌
側田亦希望撞出新火花：「我同RubberBand識咗好耐，以前都係同公司，但一齊開show真係未試過，所以今次有機會合作，真係好難得。我好珍惜呢次機會，希望同佢哋撞出啲新火花，帶俾到觀眾一個驚喜。」他認為今次Cross Over將為觀眾帶來新鮮感，「我其實鍾意佢哋好多歌！我都想唱多啲勵志嘅歌，帶多少少Gospel風格。我哋將會融合成一隊band，等於呢隊band多了一個主唱及和聲。」
長居海外嘅側田表示，會返香港練歌，務求最佳狀態演出：「彩排我一定會返香港！現場一齊夾先至最有火花，所以點都會返嚟一齊練。其實我哋都係Mark Lui帶入行，音樂路上行嘅方向都好相似，加上都試過同公司，所以感覺上會特別夾。」
ADVERTISEMENT
